काठमाडौं । एक साताको चीन भ्रमणपछि नेपाली यू–१९ महिला फुटबल टोली म्यानमार पुगेको छ । शुक्रबारबाट सुरु हुने एएफसी यू–१९ च्याम्पियनसिपको दोस्रो चरणमा सहभागि हुन नेपाली महिला टोली म्यानमार पुगेको हो । 
चीन भ्रमणका क्रममा नेपालले दुई मैत्रीपूर्ण खेल खेलेको थियो । छेन्दु प्रान्तको उमेर समूहको टोलीसँग नेपालले पहिलो खेलमा ३–० को हार ब्यहोरेको थियो भने दोस्रो मैत्रीपूर्ण खेलमा १–१ को बराबरी खेलेको थियो ।
कमजोरी सुधार्ने रणनीतिका साथ म्यानमार पुगेको नेपालले पहिलो खेल शुक्रबार अष्टेलियासँग खेल्नेछ । यसअघि गत कात्तिकमा थाइल्याण्डमा सम्पन्न पहिलो चरणमा नेपाल उत्कृष्ट उपबिजेता भएको थियो । भारत, पाकिस्तानसँग शानदार जित निकालेको नेपाल थाइल्याण्डसँग पराजित भएपनि उत्कृष्ट उपबिजेता बन्दै दोस्रो चरणमा स्थान बनाउन सफल भएको थियो ।