काठमाडौं । हिन्दु राष्ट्रको माग गर्दै आन्दोलनरत राष्ट्रिय प्रजातन्त्र पार्टी (राप्रपा) र सरकारबीच मंगलबार वार्ता भएको छ । सिंहदरबारस्थित कानून न्याय तथा संसदीय व्यवस्था मन्त्रालयमा सरकार र राप्रपाबीच वार्ता भएको हो ।
पहिलो चरणको वार्तामा राप्रपाद्वारा गठित वार्ता टोलीले आफ्नो दलले अघि सारेका २२ बुँदे मागका बारेमा सरकारी वार्ता टोलीलाई जानकारी गराएको छ । ‘‘पहिलो चरणको वार्ता विषय प्रवेशका रुपमा अघि बढेको छ । हाम्रो तर्फबाट सरकार समक्ष २२ बुँदे मागका बारेमा बुँदागत रुपमा जानकारी दिने काम भएको छ,’’ राप्रपाका प्रचार विभाग प्रमुख मोहन श्रेष्ठले जानकारी दिए ।
वार्तामा सरकारकातर्फबाट कानूनमन्त्री भानुभक्त ढकाल, कानून सचिव राजीव गौतम, कानून मन्त्रालयका उच्चपदस्थ अधिकारी तथा राप्रपाकातर्फबाट वार्ता टोली संयोजक दीपक बोहरा र निरञ्जन थापा सहभागी थिए । राप्रपाको वार्ता टोलीका सदस्य तथा महामन्त्री राजेन्द्र लिङदेन उपत्यका बाहिर भएकाले वार्तामा उपस्थित भएनन् ।
सरकारले वार्ताका लागि औपचारिक रुपमै पत्र पठाएपछि राप्रपाले सोमबार बोहराको संयोजकत्वमा तीन सदस्यीय वार्ता टोली गठन गरेको थियो । गत आइतबार कानूनमन्त्री ढकालले राप्रपा अध्यक्ष कमल थापालाई पत्र पठाउँदै वार्तामा आउन आग्रह गरेका थिए । सरकार र राप्रपाबीचको दोस्रो चरणको वार्ता एक साता पछि फेरि हुने बताइएको छ ।
नेपाललाई हिन्दु राष्ट्र घोषणा गर्नुपर्ने, राजासहितको लोकतन्त्र स्थापनाका लागि सर्वपक्षीय गोलमेच सम्मेलन गर्नुपर्ने, संघीयता बारे जनमतसंग्रह गर्नुपर्नेलगायतका २२ बुँदे माग राख्दै राप्रपा चरणबद्ध रुपमा आन्दोलन गर्दै आएको छ । यसअघि राप्रपाले गत फागुन ७ गते प्रधानमन्त्री केपी शर्मा ओलीलाई २२ बुँदे ज्ञापनपत्र बुझाउँदै माग पूरा गराउन सरकारको ध्यानाकर्षण गराएको थियो ।
तस्बिर श्रोत : मोहन श्रेष्ठको ट्वीटर