बीबीसी । बलिउड अभिनेता सनी देओल भारतीय जनता पार्टीमा प्रवेश गरेका छन् । दिल्लीमा रक्षा मन्त्री निर्मला सीतारमण र रेल मन्त्री पीयूष गोयलको उपस्थितिमा उनले सदस्यता लिएका छन् । 
सनी देओललाई सदस्यता प्रदान गर्दै रक्षा मन्त्री गोयलले भने, “सनीले आफ्नो फिल्ममा सधै सुरक्षा बलको मनोबल बढाएका छन् । अहिलेको परिस्थितिमा देशका युवालाई प्रेरणा दिने काम सनी देओलले फिल्मका माध्यमबाट गरेका छन् । मलाई विश्वास छ कि राजनीतिक जीवनमा पनि यस्तै काम गर्नेछन् ।’’
सनी कुन क्षेत्रबाट चुनाव लड्छन् भन्ने पत्रकारको प्रश्नमा उनले यसको निर्णय पार्टीले गर्ने प्रतिक्रिया दिए । बलिउड अभिनेता सनी देओल पञ्जाबको गुरदासपुर क्षेत्रबाट लोकसभा चुनाव लड्ने अनुमान गरिएको छ । गुरदासपुर क्षेत्रबाट अभिनेता विनोद खन्ना चुनाव लड्दै आएका थिए । उनको निधनपछि २०१७ को उपचुनावमा कांग्रेसका सुनील जाखडले चुनाव जितेका थिए । 
सनी देओलका बुवा अभिनेता धर्मेन्द्र २००४ देखि २००९ सम्म राजस्थानको बीकानेरबाट भाजपा सांसद थिए । उनकी पत्नी हेमा मालिनी मथुराबाट सांसद थिइन् । अभिनेत्री हेमा मालिनी यस पटक फेरि मथुराबाटै चुनाव लड्दै छिन् । 
सनी देओल आफ्नो समयमा बलिउडका लोकप्रिय अभिनेता हुन् । उनको छवि ‘एक्सन हिरो’ का रुपमा रह्यो । सनीले १९८२ मा फिल्म ‘बेताब’ बाट करियर सुरु गरेका थिए । १९९० मा प्रदर्शित फिल्म ‘घायल’ बाट उनको लोकप्रियता एकाएक बढेको थियो । ‘दामिनी’, ‘गदर’, ‘हिरो’, ‘अपने’ सनी देओलका प्रमुख फिल्महरु हुन् ।