काठमाडौं । साताको दोस्रो दिन धितोपत्र बजार घटेको छ । पहिलो दिन उच्च अंकको सुधार देखिएको बजारमा दोस्रो दिन गिरावट आएको हो ।
आइतबार नेप्से घट्दा नयाँ वर्षको पहिलो दिनदेखि बढ्न थालेको बजारले सुधारिने क्रम गुमायो । यसक्रममा नेप्से परिसूचक ७ दशमलव २६ अंकले घटेर १ हजार २ सय ५६ दशमलव ९४ अंकमा कायम भयो । नप्से ०.५७ प्रतिशतले घट्दा बजारमा सेन्सिटिभ इन्डेक्स २ दशमलव ०४ अंकले घट्यो ।
नेप्से घट्दा कारोबार रकम भने १ अर्ब कायम रह्यो । बजारमा दिनभर १ अर्ब ३ करोड ७६ लाख रुपैयाँको सेयर किनबेच भएका हुन् । यसक्रममा १ सय ६८ कम्पनीका ३२ लाख २२ हजार २ सय ५६ कित्ता सेयर कारोबारमा आए ।
नेप्से घट्नु तथा कारोबार रकम अर्ब नजिक नै कायम रहँदा बजारमा छोटो समयमा प्रोफिट बुक गर्न चाहने लगानीकर्ता सल्बलाएको देखिन्छ । १ बजेसम्म सामान्य उतारचढाव देखिएको बजार त्यसपछि निरन्तर रुपमा नै ओरालो लागिरहँदा गिरावट भोग्नुपर्यो । त्यसो त अन्तिम समयमा सुधारका लागि गरेको सामान्य प्रयासले बजारमा ठूलो परिवर्तन ल्याउन सकेन ।
नेप्से घटेको दिन बजारमा कारोबारमा आएका ११ मध्ये ७ वटा समूहमा गिरवाट आए । ट्रेडिङ, निर्जीवन बीमा, उत्पादनमूलक र जस्वन बीमाबाहेक सबै समूह घटे । घट्नेमा सबैभन्दा बढी होटल समूह २४ दशमलव ९७ अंकले ओरालो लाग्यो । बढ्नेमा जीवन बीमा समूह सर्वाधिक १ सय ५४ दशमलव २९ अंकले सुधार भयो ।
यसदिन कारोबार रकमका आधारमा अघिल्लो दिनझैं नेपाल बैंकले शीर्ष स्थान ओगट्यो । बैंकको दिनभर ९ करोड ३६ लाख रुपैयाँ बराबरको सेयर खरीदबिक्री भए ।
नेप्से घटेको दिन बजारमा एभरेस्ट इन्स्योरेन्स कम्पनीका सेयरधनीले सबैभन्दा धेरै कमाए । कम्पनीको सेयरमूल्य सर्वाधिक ९ दशमलव ७७ प्रतिशतले बढ्दा माउन्टेन हाइड्रोका लगानीकर्ताले सबैभन्दा बढी ५ दशमलव २ प्रतिशत सेयर मूल्य गुमाए ।
फाइल तस्बिर