एजेन्सी । रुसका वैज्ञानिकहरुले ४२ हजार वर्ष पुरानो घोडाको बच्चाको शव फेला पारेका छन् जसका भित्री अङ्ग अझैपनि सुरक्षित अवस्थामा रहेको बताइएको छ । यस्तोमा सो प्राचीन जीवको रगत र पिशाब समेत निकालि अध्ययन गर्न सकिने भएको हो ।
मंगलबार मात्र वैज्ञानिकहरुले उक्त संरक्षित नमुनाको शव अध्ययनका लागि चिरफार गरिएको खबर गरेका हुन् । वास्तवमा सो शव जीव विज्ञान सम्बन्धी एक अभियानका क्रममा बाटगइ बेसिनमा फेला पारिएको थियो ।
साइबेरियाको भरखोयानस्क क्षेत्रमा भेटिएको सो शव उचाइमा रहेका कारण नै सुरक्षित अवस्थामा भेटिन सफल भएको याकुतस्थित नर्थइस्टर्न फेडेरल युनिभर्सिटीको म्यामोथ म्युजियमका निर्देशक सेमयोन ग्रिगोरिभ बताउँछन् । लोप भइसकेको ‘म्यामोथ’ प्रजातिको हात्तीको दाँत खोजिरहेको टोलीले सो प्राचिन जीव अघिल्लो वर्षको गर्मी याममा फेला पारेको थियो ।
मृत्युको समयमा सो जीव केवल दुई हप्ताको मात्र रहेको र माटोमा पुरिएर ज्यान गएको अनुसन्धानबाट पत्ता लगाइएको सीएनएनले जनाएको छ । यसरी सो जीवको शरीरको रौँमा समेत कुनै क्षति नपुग्नु आश्चर्यजनक र दुर्लभ घटना भएको बताइएको छ । यस्तोमा त्यस शताब्दीको घोडा कस्तो रङको थियो भन्ने पनि पत्ता लगाउन सकिने भएको बताइएको हो ।
यस अगाडि वैज्ञानिकहरु अर्को एक ११ हजार ७ सय वर्ष अगाडिको संरक्षित जीवबाट पनि यसैगरी रगत निकाल्न सफल भएका थिए । वास्तवमा प्राचीन जीवजन्तुहरुको रगत प्राय धुलोमा परिणत हुने वा जम्ने गर्दछ जसकारण धेरै उचाईमा रहँदा मात्र तिनको रगत तरल अवस्थामा रहन सक्छ जसलाई अत्यन्तै दुर्लभ मानिन्छ ।
अहिले भने दक्षिण कोरियास्थित एक अनुसन्धान कम्पनीले यस प्रचीन जनावरको ‘क्लोन’ अर्थात वंशाणु रुपले समान जीव बनाउनमा काम गरिररहेको बताएको छ । यसरी सो ‘क्लोनिङ’ सफल भएमा विश्वले ४२ हजार वर्ष अगाडिको जीव देख्न पाउने अपेक्षा गरिएको छ ।