कञ्चनपुर । प्रमुख प्रतिपक्षी दल नेपाली कांग्रेसका नेता एनपी साउँदले कृष्णपुर नगरपालिका-८ बिचवाका सुविल बडायकको हत्यामा संलग्नमाथि कडा कारबाहीको माग गरेका छन् ।
मृतक बडायकको घर पुगेर आफन्तसँगको भेटपछि सामाजिक सञ्जाल फेसबुकमा ‘स्टाटस्’ लेख्दै नेता साउँदले हत्यामा संलग्न दोषीमाथि कडा कारबाहीको माग गरेका हुन् । उनले कञ्चनपुरकै १३ वर्षीया बालिका निर्मला पन्तका हत्यारा अहिलेसम्म पक्राउ नपरेको प्रसंग स्मरण गर्दै लेखेका छन्, ‘‘कञ्चनपुरमा फेरि पनि बढ्दो अपराध ! नौ महिना अघि भएको निर्मला पन्त हत्याकाण्ड पछि फेरि कृष्णपुर-८ रैकवार बिचवामा १८ वर्षीय किशोर सुबिल बडायक (थारू) को टाउको छिनाई विभत्स हत्या भएको छ । पीडित परिवारको किटानी जाहेरीमा केही व्यक्ति थुनिएका छन् । प्रहरीसँग बुझ्दा अनुसन्धान जारी भएको बताएको छ । दिवंगत आत्मालाई श्रद्धाञ्जली ! शोक सन्तप्त परिवारमा सम्वेदना !! संलग्न अपराधीलाई कानून बमोजिम कडा कारबाही होस !!! दोषीले उन्मुक्ती नपाओस !’’
चैत २८ छिमेकी गाउँ कलुवापुरमा विवाहमा गएका १९ वर्षीय सुविल बडायक बैशाख २ सोमबार मृत फेला परेका थिए । उनको शव गाउँ नजिकैको उग्रतारा सामुदायिक वनमा पर्ने लम्बा चाँदर भन्ने स्थानको न्युरा खोलामा हत्या गरिएको अवस्थामा फेला परेको हो । इलाका प्रहरी कार्यालय रैकवार बिचवाले बडायकको शव न्युरा खोलामा जमिनमुनी आधा गाडिएको अवस्थामा फेला परेको बताएको छ ।
प्रहरीका अनुसार बडायकको घाँटी काटेर हत्या गरिएको हो । प्रहरीले हत्याको आशंकामा कलुवावुरका १८ वर्षिय अयोध्या राना, सोही उमेरका प्रमोद राना र १६ वर्षिया किशोरी शिवानी रानालाई पक्राउ गरेको छ । प्रहरीले घटनाको थप अनुसन्धान भइरहेको जनाएको छ ।