काठमाडौं । स्थानीय वायुको प्रभावका कारण काठमाडौं उपत्यकासहित देशको मध्य र पश्चिमी पहाडी क्षेत्रमा शुक्रबार साँझ मौसम बदली भएको छ ।  स्थानीय वायुको प्रभावका कारण यी क्षेत्रमा हावाहुरीसहित असिना पानी परेको जल तथा मौसम पूर्वानुमान महाशाखाका मौसमविद् राजुधर प्रधानाङ्गले जानकारी दिए ।

यी क्षेत्रमा मेघ गर्जनसहित वर्षा हुने र चट्याङ पर्ने सम्भावना देखिएकाले यसबाट बच्न मौसमविद्ले आग्रह गरेका छन् । 

“स्थानीय वायुको प्रभावका कारण अहिलेको मौसम बदली भएको हो । देशको मध्य र पश्चिमी पहाडी क्षेत्रमा हुरीबतासहित असिना पानी परेको छ । यो क्षेत्रको केही स्थानमा चट्याङ पर्ने सम्भावना पनि देखिएको छ,” प्रधानाङ्गले बाह्रखरीसँग भने ।