बीबीसी । उत्तर कोरियाले अमेरिकी विदेशमन्त्री माइक पम्पेओलाई आणविक वार्ताबाट हटाउन माग गरेको छ । अमेरिकी विदेशमन्त्रीलाई जथाभावी र लापरवाहीपूर्ण ढंगले बोलेको भन्ने समेत उसले आरोप लगाएको छ ।
विदेश मन्त्रालयका एक वरिष्ठ अधिकारीले वार्तामा पम्पेओलाई समावेश गरिए त्यो वार्ता घटिया हुने भएकोले उनको सट्टामा अर्को कोही होशियार मान्छे राख्न समेत आग्रह गरेका छन् । उत्तर कोरियाले ‘ट्याक्टिकल गाइडेड’ हतियार परीक्षण गरेको कुरा चर्चामा भइरहेको बेलामा उत्तर कोरियाका तर्फबाट पछिल्लो भनाई आएको हो ।
अमेरिका र उत्तर कोरियाबीच दोस्रो शिखर सम्मेलन गएको फेब्रुवरीमा भियतनामको हनोइमा भएकोमा सफल हुन सकेको थिएन । गएको वर्ष पम्पेओले चार पटक उत्तर कोरियाको भ्रमण गरेका थिए ।
गएको हप्ता अमेरिकी सिनेटको उपसमितिको सुनुवाईका क्रममा पम्पेओलाई एउटा प्रश्न सोधिएको थियो,‘‘किमलाई उत्पीडकको रुपमा तपाई व्याख्या गर्नुहुन्छ ?,’’ पम्पेओले जवाफ दिएका थिए,‘‘निश्चित रुपमा । मैलै त्यो भनेको छु ।’’
त्यसको विरोधमा उत्तर कोरियाको विदेशमन्त्रालयका अधिकारी क्वन जङ गनले पम्पेओको भनाईलाई लापरवाहपिूर्ण तरिकाले बोलेको र कोरियाका सर्बोच्च नेताको सम्मानमा चोट पुर्याएर आफ्नो चरित्र देखाएको आरोप लगाएका छन् । क्वनले पम्पेओलाई हनोइ वार्ता भाँडेको पनि आरोप लगाएका छन् ।
अर्को वार्ता हुने हो भने त्यो वार्तामा पम्पेओ हुन नहुने समेत उनले बताएको कोरियन सेन्ट्रल न्यूज एजेन्सी(केसीएनए)ले जनाएको छ । (बीबीसी)