काठमाडौं । नेपाल टेलिकमले फोर जी सेवालाई देशव्यापी रुपमा विस्तार गर्न लागेको छ । कम्पनीले व्यवसाय मात्र सञ्चालन नगरी सेवालाई समेत प्राथमिकता दिने आफ्नो दायित्व पुरा गर्न सेवा विस्तार तीव्र गतिमा अघि बढाउको जनाएको हो ।
बिहीबार टेलिकमले आयोजना गरेको अन्तरक्रिया कार्यक्रममा टेलिकमका प्रबन्ध निर्देशक डिल्लीराम अधिकारीले नेपाली जनता बसोबास गरेका सबै स्थानमा सेवा उपलब्ध गराएको बताए । छोटो अवधिमै फोर जी सेवालाई देशव्यापी रुपमा विस्तार गर्ने योजनाका साथ कम्पनी अगाडि बढेको उनको भनाई छ ।
कम्पनीले सेवा विस्तार गर्न लागेको फोरजी–एलटीई आयोजनाअन्तर्गत मध्य पहाडी लोकमार्ग अप्टिकल फाइबर आयोजना, एफटीटीएच सेवा विस्तार र गुणस्तर सुधार गरिरहेको जनाएको छ ।
सो कार्यक्रममा टेलिकमकी प्रवक्ता प्रतिभा वैद्यले काम सुरु भएको दाबी गरिन् । उनले फोरजी–एलटीई आयोजना सातै प्रदेशमा सेवा विस्तारको लागि गत २०७५ माघ २० मा तीन वटा सम्झौता सम्पन्न भएको दाबी गरिन् ।
जसमध्ये कोर नेटवर्कका लागि चीनको जेडटीई कर्पोरेसन तथा नेटवर्क १ र नेटवर्क २ का लागि हङकङको सीसीएसआईले जिम्मेवारी पाएका छन् । उनीहरुले विस्तार सर्वेक्षणको काम तीव्र रुपमा अघि बढाउका हुन् ।
सेवाअन्तर्गत टेलिकमले ६५ लाख प्रयोगकर्ता क्षमताको दुईवटा नेटवर्क विकास गर्नेछ । पहिलो १ अन्तर्गत प्रदेश २, ३, ५ र ६ तथा नेटवर्क २ अन्तर्गत् प्रदेश १, २, ४, ५ र ७ का विभिन्न स्थान पर्छन् ।
ती कम्पनीसँगको सम्झौताअनुसार १२ महिनामा कार्य सम्पन्न गर्नको लागि साइट सर्भेको काम सम्पन्न हुन लागेको हो । टेलिकमले नेपालमै पहिलो पटक २०७३ पुस १७ (२०१७ जनवरी १) मा काठमाडौं उपत्यका र पोखराबाट फोरजी सेवा शुरु गरेको थियो ।
सेवा विस्तारअन्तर्गत चालु आर्थिक वर्षको चैत मसान्तसम्म ४ सय वटा थ्रीजी बीटीएसको स्तरोन्नति गरिएको छ । यस अवधिमा ४ सय ७ वटा बीटीएस थप गरिएको छ ।
१ करोड लाइन मोबाइल आयोजना अन्तर्गत ग्राहकको माग एवम् प्राविधिक अध्ययनअनुसार आवश्यक देखिएका स्थानमा मोबाइल टावर थप गर्ने कार्य जारी रहेको टेलिकमले बताएको छ ।
आयोजना अन्तर्गत प्याकेज ‘बी’ को शतप्रतिशत काम सकिएको छ भने प्याकेज ‘ए’ को काम ९५ प्रतिशत सकिएको र चालु आर्थिक वर्ष भित्र सम्पन्न गर्ने लक्ष्य लिएको छ ।
त्यस्तै, मोबाइल गुणस्तर अभिवृद्धिमा दूरसञ्चार प्राधिकरणले गत पुस र माघ २०७५ मा भक्तपुर, पोखरा, बाग्लुङ र पृथ्वी राजमार्गमा गरेको मोबाइल सेवाको गुणस्तर परीक्षणको प्रकाशित अध्ययन प्रतिवेदन अनुसार डाटा सेवामा नेपाल टेलिकमको गुणस्तर सबैभन्दा राम्रो भएको बताएको छ ।
प्राधिकरणले आश्विन ११ देखि २५, २०७५ सम्म काठमाडौंमा गरेको मोबाइल सेवाको गुणस्तर परीक्षणको अध्ययन प्रतिवेदनअनुसार नेपाल टेलिकमको भ्वाइस सेवाकोस्तर सबैभन्दा राम्रो पाइएको हो । मध्य पहाडी लोकमार्गमा अप्टिकल फाइबर मध्य पहाडी लोकमार्ग अन्तर्गत प्रदेश १, २ र ३ मा पर्ने स्थानमा अप्टिकल फाइबर बिछ्याउने कार्यको जिम्मेवारी नेपाल दूरसञ्चार प्राधिकरणले नेपाल टेलिकमलाई दिएको छ ।
आयोजनाका लागि ५ मध्ये ४ वटा सम्झौता सम्पन्न भइसकेका छन् । गत मार्च १२ देखि २२ सम्म विभिन्न चरणमा गरिएको सम्झौताअनुसार प्रदेश १ को ५ सय ९६ किलोमिटरका लागि कोरियाको एलएस केबल्स, प्रदेश २ को १ हजार २८ किलोमिटरको लागि आरोग्य कन्स्ट्रक्सन नेपाल र चाइना रेलवेको ज्वाइन्ट भेन्चर तथा प्रदेश ३ को ५ सय ५५ किलोमिटरको लागि हङकङको सीसीएसआईसँग सम्झौता भएको छ ।
डिडब्लुडिएम इक्विपमेन्टका लागि हङकङको सीसीएसआईसँग सम्झौता भएको छ भने राउटर इक्विपमेन्टका लागि केही दिन भित्रै सम्झौता हुने बताइएको छ । एफटीटीएच (फाइबर टु द होम) सेवा सम्बन्धी हाल एडीएसएलमार्फत् इन्टरनेट सुविधा उपलब्ध गराइरहेकोमा विद्यमान एडीएसएलका ग्राहकलाई एफटीटीएचमा रुपान्तरण गर्ने र मुलुकभर एफटीटीएच वितरण गर्ने लक्ष्यका साथ नेटवर्क विस्तारको कार्य देशभर भइरहेको छ ।
इन्टरनेटको साथसाथै आईपीटीभी पनि प्रदान गर्ने लक्ष्यका साथ गृहकार्य भइरहेको छ । हाल देशभर ४० हजार ९ सय ६० लाइन एफटीटीएच प्रदान गर्न सकिने क्षमताको नेटवर्क तयार भएको छ र थप नेटवर्क विस्तार कार्य जारी रहेको टेलिकमले बताएको छ ।