काठमाडौं । दक्षिण एशियाका नेपालसहित भारत, पाकिस्तान र अफगानिस्तान लगायतका क्षेत्र  गएका तीनदिन यता आँधीहुरीको चपेटामा परेका छन् । पछिल्लो हुरी बतासको नेपालमा सामान्य मात्रै असर रहेपनि भारत, पाकिस्तान र अफगानिस्तानमा भने ठूलो जनधनको क्षति भएको छ । यद्यपि केही साताअघि मात्रै नेपालको बारा र पर्सा जिल्लामा आएको आँधीबेहरीका कारण २९ जनाको मृत्यु भएको थियो । 

आँधी, हुरी र बाढीका कारण भारत, पाकिस्तान र अफगानिस्तानमा तीन दिन यता १ सय जना भन्दा बढीको मृत्यु भएको समाचार एजेन्सीहरुले जनाएका छन् ।  यो क्षेत्रको मौसममा आएको बदलीका कारण उत्तरी भारत, पाकिस्तान र अफगानिस्तानमा धनजनको क्षति भएको हो । हावा हुरीका क्रममा चट्याङ र धूलोसमेत उडाउँदा सर्वसाधारण प्रभावित भएका छन् ।

तीन दिन यताको आँधी हुरीबाट पाकिस्तानमा ३९, भारतमा ४७ भन्दा बढी र अफगानिस्तानमा १५ जनाको मृत्यु भएको समाचार एजेन्सी अनादोलुले जनाएको छ ।  बुधबार रातिसम्ममा मृत्यु भएकाको संख्या अझै बढेको हुन सक्ने बताइएको छ । थुप्रै मानिस अझै हराइरहेको बताइएकाले मृत्यु हुनेको वास्तविक संख्या यकिन हुन सकेको छैन । 

पाकिस्तानको कराँची, इश्लामावाद लगायतका क्षेत्रमा हावाहुरी आउनुका साथै उत्तरी पाकिस्तानमा बाढी समेत आएको छ । भारतमा गुजरात, राजस्थान, मध्यप्रदेश, मणिपुरलगायतका क्षेत्रमा ठूलो जनधनको क्षति भएको छ । अमेरिकी समाचार संस्था एपीले ४७ जनाको भारतमा मृत्यु भएको जनाएपनि सो संख्या अहिलेसम्म निकै बढेको अनुमान गरिएको छ । अफगानिस्तानको उत्तरी र मध्य भागमा आएको बाढीका कारण जनधनको क्षति भएको छ । बाढीबाट कम्तिमा १५ जनाको मृत्यु भएको जनाइएको छ ।

नेपालमा जलवायु तथा मौसम पूर्वानुमान महाशाखाले शुक्रबार पहाडी भू–भागहरुमा आंशिकदेखि सामान्य बदली रहने र अन्य भू–भागहरुमा मौसम सामान्यतया सफा रहने जनाइएको छ । पहाडी भेगका थोरै स्थानहरुमा अपरान्हपछि वा साँझतिर मेघ गर्जनसहित हल्का वर्षको सम्भावना रहेको छ । शनिबार पहाडी भेगमा आंशिक बदली रहने र अन्य भू–भागमा मौसम सामान्यतया सफा रहने जनाइएको छ । पहाडी भेगका थोरै स्थानमा अपरान्हपछि वा साँझतिर मेघ गर्जनसहित हल्का वर्षाको सम्भावना रहेको महाशाखाले जनाएको छ ।

मौसमविद् सुवास रिमालका अनुसार दक्षिण एशियाका विभिन्न मुलुकमा आएको आँधीहुरी तथा मौसम परिवर्तनको कारण सिरियादेखि आएको पश्चिमी वायुको कारण भएको जनाए ।  अर्का मौसमविद् उज्ज्वल उपाध्यायका अनुसार प्रशान्त महासागरको भूमध्यरेखा आसपासमा देखिएको जलवायु प्रभावका कारण नेपालसम्म त्यसको असर देखिएको हो ।