काठमाडौं । वैशाख २ गते बसेको मन्त्रिपरिषद्को बैठकले ट्राफिक प्रहरीको प्रोत्साहन भत्ता व्यवस्थापन निर्देशिका-२०७५ लाई स्वीकृत गरेको छ । निर्देशिका स्वीकृत भएपछि उपत्यकाका काठमाडौं, ललितपुर र भक्तपुरमा कार्यरत ट्राफिक प्रहरीले प्रोत्साहन भत्ता पाउनेछन् । यो काठमाडौं उपत्यकाका ट्राफिक प्रहरीलाई मात्र लागु हुने छ ।
उपत्यकामा कार्यरत ट्राफिक प्रहरीको स्वास्थ्यमा गम्भीर चुनौती देखिएको र ज्यानै जोखिममा पर्ने भएपछि प्रहरी प्रधान कार्यालयको पहलमा प्रोत्साहन भत्ता बढाउने प्रस्ताव गृह मन्त्रालयले गरेको थियो । मन्त्रालयले मन्त्रीस्तरीय निर्णय गरी प्रस्ताव सहमतिका लागि अर्थ मन्त्रालयमा पठाएको थियो ।
ट्राफिक प्रहरीको जोखिम तथा कार्यसम्पादनमा आधारित प्रोत्साहन भत्तासम्बन्धी निर्देशका-२०७५ अनुसार काठमाडौं उपत्यकामा कार्यरत प्रहरी उपरीक्षकभन्दा तल्लो तहका ट्राफिक प्रहरीले २० देखि ४० प्रतिशतसम्म भत्ता पाउने प्रस्तावमा उल्लेख छ ।
हाल उपत्यकामा करिब १४ सय ट्राफिक प्रहरी कार्यरत छन् । प्रोत्साहन भत्ताअनुसार सिनियर अफिसरले २० र जुनियर अफिसरले ४० प्रतिशतसम्म भत्ता पाउने प्रहरी प्रवक्ता एसएसपी उत्तमकुमार सुवेदीले जानकारी दिए ।