काठमाडौं । करोडौँ मूल्यका मृगौलाको डाइलासिस मेसिन भक्तपुरस्थित शहीद धर्मभक्त राष्ट्रिय प्रत्यारोपण केन्द्रमा सञ्चालनमै नआएर बिग्रिएको छ । महालेखा परीक्षकले सार्वजनिक गरेको ५६ औँ वार्षिक प्रतिवेदनले केन्द्रमा मेसिन राख्ने स्थान र जनशक्ति अभाव भएको भन्दै करौडौं मूल्यका मेसिनहरु सञ्चालनमा नल्याई थन्क्याएर राखेको थियो ।
केन्द्रमा रहेका ६१ मेसिनमध्ये गत वर्षको असार मसान्तदेखि ३५ मेसिन सञ्चालनमा आएका छन् । ती मेसिनबाट २४ सैँ घण्टा सेवा दिँदा पनि १ सय २० जनाले मात्र सेवा लिने गरेको प्रतिवेदनले देखाएको छ ।
त्यसैगरी केन्द्रमा अन्य ११ वटा मेसिन बिग्रेर थन्किएको छन् । जुन मेसिन मर्मतमा ध्यान नदिँदा डाइलासिसका बिरामीलाई अन्य अस्पतालमा रिफर गर्ने गरेको प्रतिवेदनले देखाएको छ । अस्पतालका एक कर्मचारीकाअनुसार नयाँ मेसिन खरिदमा कमिसन आउने तर पुरानो मेसिनमर्मत गर्दा कमिसन नआउने भएकोले प्रशासनले पुरानो मेसिन बनाउन चासो नदिएको पाइएको हो ।
“पर्याप्त मेसिन अभाव, पूर्वाधार तथा जनशक्तिको कमीको कारण १ सय ४५ जना बिरामी हेमोडाइलासिस गर्न, ६८ जना मिर्गौला प्रत्यारोपण गर्न र २ जना पियर एक्सचेन्जको लागि प्रतीक्षामा छन् ”प्रतिवेदनले भनिएको छ ।
त्यसैगरी केन्द्रमा १ सय ५३ जनाले मृगौला प्रत्यारोपण गरेका छन् भने ओपीडी सेवालगायतका अन्य सेवा ३१ हजार ५ सय ६५ जनाले लिएका छन् । हरेक वर्ष मृगौलासम्बन्धी बिरामीको संख्या वृद्धि हुँदै गएकोले हालको अस्पताल भवनबाट सेवा प्रवाह गर्न असुविधा भइरहेको जनाएको छ ।
केन्द्रको भक्तपुर अस्पतालको बन्दै गरेको भवनमा सरकारले ३ करोड २५ लाख विनियोजन गरे पनि कुनै काम नभएको पाइएको छ । जसमा अस्पतालको नयाँ भवन ड्रइङ डिजाइन, भवन निर्माण विस्तार र निर्मित भवनमा आवश्यक उपकरण जडानसमेत गर्न रु ३ करोड २५ लाख बजेट विनियोजन भएकोमा सोसम्बन्धी कुनै काम नभएको प्रतिवेदनमा उल्लेख छ ।
केन्द्रले आर्थिक वर्ष २०७४-०७५ मा १ लाख ९ हजार ९ सय ९ मा खरिद गरिएको ट्रान्सफर्मर जडान नगरी थन्क्याएर राखेको छ ।
