इंग्ल्यान्ड । विभिन्न एप तथा वेबसाइटहरुमार्फत साथी बनाउने तथा डेटिङ गर्ने भनिएका प्लेटफर्महरु सुरक्षित नभएको निष्कर्ष निकालिएको छ । सामाजिक सञ्जालको बढ्दो प्रयोगसँगै यस्ता एपहरुले फेसबुक, ट्वीटरबाट पनि प्रयोगकर्ता तान्ने काम गरिरहेका हुन्छन् ।
पछिल्लो चार वर्षयता बेलायतमा अनलाइन डेटिङ साइट तथा विभिन्न एपमार्फत यौन अपराध दोब्बरले वृद्धि भइरहेको प्रहरीको तथ्यांकमा उल्लेख छ । प्रहरीको तथ्यांकअनुसार डेटिङ साइटमार्फत सन् २०१५ मा १५६ यौन अपराध दर्ता भएका थिए भने सन् २०१८ मा २५६ अपराधका घटना दर्ता भएको जनाइएको छ । इंग्ल्यान्ड र वेल्समा ४३ मध्ये २३ वटा घटना जबरजस्तीका दर्ता भएको प्रहरीको तथ्यांकमा उल्लेख छ ।
अनलाइन डेटिङ एसोसियसनले भने प्रयोगकर्ताहरुलाई सुरक्षित बनाउनेतर्फ प्रयास भइरहेको प्रतिक्रिया दिएको छ । तर, राष्ट्रिय प्रहरी प्रमुख परिषद्ले भने एपमा धेरै कुराहरुमा सुधार गर्नुपर्ने बताएका छन् । प्रहरीले सन् २०१५ देखि २०१८ सम्म यौन अपराधसहितका दुई हजार २९ अपराधका घटना दर्ता भएको तथ्यांक सार्वजनिक गरेको छ । सन् २०१५ मा जम्मा ३२९ यौन अपराधका घटना दर्ता भएकोमा सन् २०१८ मा ६८५ यौन अपराधका घटना दर्ता भएका थिए ।
एप सञ्चालक कम्पनीले प्रयोगकर्ताको सुरक्षाका लागि थप अनुसन्धान गरी सुधार गर्नुपर्ने पीडितहरुको गुनासो छ । उनीहरुले पीडितको खोजी गरेर उनीहरुलाई त्यस्तो अपराधबाट मुक्त गराउनसमेत सुझाव दिएका छन् । डेटिङ साइटमा भेटेको दुई महिनापछि एन्थोनी लोइले सेप्टेम्बर २०१७ मा २६ वर्षीया कथरिन स्मिथको धारिलो हतियार प्रहार गरी हत्या गरेका थिए । अनुसन्धानका क्रममा स्मिथलाई ३३ पटक उक्त हतियार प्रहार गरिएको पाइएको थियो ।
लोइलाई हत्याको अभियोगमा १८ वर्षको जेल सजाय सुनाइएको छ । उनले फेक आइडी बनाएर स्मिथसँग परिचय गरेका थिए । उनले आफू स्मिथभन्दा १० वर्ष कान्छो भएको र नाम टोनी मुरे बताएका थिए । कथरिनकी आमा डेबी भन्छिन, "कसैलाई पनि यस्तो एप तथा साइटहरुमा भेट्दा दोहोरो जाँच गर्नुपर्दछ । डबल चेक र क्रस चेक गरेर उक्त व्यक्तिको विगत र वर्तमानबारे यथार्थ बुझेरमात्रै सम्बन्ध अघि बढाउनु पर्दछ ।"
"यदी कथरिनले लोइ अपराधिक पृष्ठभूमिको हो भन्ने जानेको भए उनी पक्कै पनि लोइलाई भेट्न जाँदैन थिइन् होला", डेबीले भनिन् । प्रहरी प्रमुख परिषदले उक्त प्रयोगकर्ताहरुलाई सुरक्षित बनाउनु यस्ता प्लेटफर्मको सामाजिक उत्तदायित्व भएको बताएको छ । अपराधीहरुले यस्ता प्लेटफर्ममार्फत सामजमा जो सबभन्दा कमजोर छ त्यसलाई बढी हानी पुर्याउने गरेको पाइएको प्रहरी परिषद्ले जनाएको छ ।
अनलाइन डेटिङ एसोसियसनका कार्यकारी प्रमुख जर्ज किडले भने, "यूकेमा मात्र यस्ता प्लेटफर्म प्रयोगकर्ताहरु एक करोड छन् । यसलाई हामीले उत्सवका रुपमा मनाएका छौं र यसको सुरक्षाप्रति पनि हामी सजग हुन्छौं ।" म्याच ग्रुप नामक डेटिङ एप कम्पनी प्लेन्टी अफ फिसले यसको सुधार र परिमार्जनका लागि वार्षिक करोडौं खर्चिने गरिएको बताएको छ । वार्षिक रुपमा एप संशोधन गर्दा गैरसामाजिक व्यवहार गर्ने प्रयोगकर्ताहरुलाई एपमार्फत हटाउने र थप सुरक्षित बनाउने गरको कम्पनीले जनाएको छ ।
बीबीसीबाट