काठमाडौं । सोलुखुम्बुको लुक्का विमानस्थलमा समीट एयरको विमान दुर्घटनामा परेको छ । लुक्लाबाट काठमाडौं ‘टेकअफ’ गर्ने क्रममा समीट एयरको जहाज मनाङ एयरको हेलिकोप्टरसँग ठोक्किएको थियो । दुर्घटनामा दुईजनाको मृत्यु भएको त्रिभुवन विमानस्थलका प्रवक्ता प्रतावबाबु तिवारीले जानकारी दिए ।

उनका अनुसार समीट एयरका को पाइलट र एकजना सुरक्षाकर्मीको मृत्यु भएको हो ।  समीट एयरका को पाइलट एस ढुंगाना र असई रामबहादुर खड्काको मृत्यु भएको उनले जानकारी दिए । समीट एयरका पाइलट आरबी रोकाया गम्भीर घाइते भएको उनले जानकारी दिए । विमानस्थलमा अन्य यात्रु थिएनन् भने एयर होस्टेस पनि घाइते भएकी छन् । 

कलसाइन ९ एन–एएमएच रहेको विमान मनाङ एयरको हेलिकोप्टरसँग ठोक्किएको प्रहरी प्रवक्ता एसएसपी उत्तम सुवेदीले जानकारी दिए । विमान ठोक्किँदा श्री एयरको विमानमा पनि क्षति पुगेको छ । उनले पनि दुईजनाको मृत्यु भएको पुष्टि गर्दै अन्य तीनजना घाइते भएको जानकारी दिए । उनले घाइते भएका तीनजनालाई श्री एयरको हेलिकोप्टरबाट काठमाडौं ल्याइँदै गरेको जानकारी दिए ।
तस्बिर : लाल गुरूङको फेसबुकबाट