काठमाडौं । महालेखापरीक्षक टंकमणि शर्माले महालेखापरीक्षको ५६ औं प्रतिवेदन राष्ट्रपतिसमक्ष पेस गरेका छन् । शर्माले संघ, प्रदेश, स्थानीय तह लगायत तोकिएका अन्य निकायको आर्थिक वर्ष २०७४–७५ को लेखापरीक्षण सम्पन्न गरी महालेखापरीक्षकको ५६ औं वार्षिक प्रतिवेदन बुझाएका हुन् ।
महालेखाले संघ, प्रदेश र स्थानीय तह समेत गरी ६ हजार ५ सय ४४ वटा निकायको लेखापरीक्षण सम्पन्न गरेको हो ।
प्रतिवेदन ग्रहण गर्दै राष्ट्र विद्यादेवी भण्डारीले लेखापरीक्षणका नजिताले समग्र मुलुकी प्रशासनको अवस्था बारे जानकारी प्राप्त गरी सुधारका कार्यलाई मार्गनिर्देश गर्न सहयोग पुग्ने बताइन । उनले सार्वजनिक वित्तीय व्यवहारमा आर्थिक अनुशासन र जवाफदेहिताको महत्वर्पूण भूमिका रहने उल्लेख गर्दै प्रतिवेदनमा औंल्याईएका विषयलाई नेपाल सरकार, संघीय संसद, प्रदेश सभा, स्थानीय तह लगायत सम्बन्धित सबैले गम्भीरतापूर्वक लिई कार्यान्वयनमा लैजानु पर्ने बताइन् ।
महालेखापरीक्षकको कार्यालयले प्रदेश सरकार र सो अन्र्तगतका निकायको आर्थिक वर्ष २०७४–७५ को लेखापरीक्षण सम्पन्न गरी तयार पारिएको वार्षिक प्रतिवेदन ७ वटै प्रदेशका प्रदेश प्रमुखसमक्ष पेश गरेको छ भने ७ सय ५३ स्थानीय तह मध्ये ७ सय ४७ को आर्थिक वर्ष २०७४–७५ को लेखापरीक्षण सम्पन्न गरी तयार भएका प्रतिवेदन सम्बन्धित स्थानीय तहलाई बुझाउने काम सुुरु गरेको छ ।
वार्षिक प्रतिवेदनमा लेखापरीक्षण गरिएका निकायको विवरण, लेखापरीक्षणबाट देखिएका बेरुजूको स्थिति, लेखापरीक्षणबाट देखिएको समग्र व्यहोरा, लेखापरीक्षण प्रतिवेदनको कार्यान्वयन स्थिति र भविष्यमा गर्नुपर्ने सुधार लगायतका विषयहरु समावेश गरिएका छन् ।