– आलिया भट्ट

करिअरमा लगातार सुपरहिट फिल्म दिँदै भर्खरै ‘फिल्मफेयर’बाट सर्वोत्कृष्ट अभिनेतृको अवार्ड पाएकी आलिया भट्टको अनुहारमा हिजोआज बेग्लै चमक देखिन्छ । यसलाई रणवीर कपुरको प्रेम भन्न उनी कत्ति हिच्किचाउँदिनन् । अहिले ‘कलंक’ फिल्मबाट उनी पुनः चर्चाको शिखरमा छिन् । पुराना निर्देशक महेश भट्टकी छोरी आलियाले ‘नवभारत टाइम्स’सँगको कुराकानीमा आफ्नो फिल्म करिअर, वरुण धवन, रणवीर कपुर, प्रेम, विवाह र आमाबारे खुलेर बताइन् । प्रस्तुत छ, सम्पादित अंश—

१) तपाईंलाई अहिलेको समयकी सबैभन्दा सामथ्र्य र परिस्कृत अभिनेतृ भनिन्छ । मान्छेहरू तपाईंलाई नम्बर १ अभिनेतृको उपमा दिन्छन् । कस्तो लाग्छ ?

इमानदरीपूर्वक भन्ने हो भने यी कुराबारे म सोच्दै सोच्दिनँ । म जे गर्छु, आफ्ना लागि गर्छु । म गन्तव्यभन्दा यात्रामा बढी रुचि राख्छु । हरेक दिन शुटिङमा जानु, फिल्म रिलिज हुनु, कहिलेकाहीँ मान्छेहरूसँग भेट्नु— यी यात्राका खुड्किला हुन् । मलाई यिनै खुड्किला महत्वपूर्ण लाग्छन् । मलाई दर्शकले प्रेम गर्नुहुन्छ, मैले पनि चरित्रमार्फत उहाँहरूलाई प्रेम दिन्छु । हो, सफलता अत्यन्तै महत्वपूर्ण हो । तर, म सफलतामै रमेर बसिराख्दिनँ । मैले जे गरिरहेकी छु, सफलता पाउनकै लागि गरेकी होइन । म सफलताभन्दा सिर्जनात्मकता र रचनात्मकतामा बढी विश्वास राख्छु । मलाई चरित्र चाहिन्छ । फरक–फरक निर्देशकसँग काम गर्ने मौका चाहिन्छ । म यात्रा गर्न रुचाउँछु । ब्रान्डका लागि काम गर्न चाहन्छु । यदि मैले ‘नम्बर १ अभिनेतृ’जस्ता विषयमा ध्यान दिन थालें भने हुनसक्छ मेरो ‘एट्टिट्युड’ बलदिन सक्छ । म आफूले पाएका कामप्रति कृतज्ञ छु । यही कारण ‘फिल्मफेयर’ अवार्ड पाउने बेला मैले लामैलामो भाषण लेखें । मलाई लाग्यो— मैले मन्दिर¬–मस्जिद गएर शीर झुकाउनु पर्छ र सबैलाई आफ्नो ब्रह्मले भ्याएसम्म कृतज्ञता ज्ञापन गर्नुपर्छ । किनकि, यो सफलता ममात्रै एक्लैको होइन, मसँग जोडिएका सबैको हो । म यो यात्रामा एक्लै हिँड्थें भने यहाँसम्म कहिल्यै आइपुग्ने थिइनँ ।

२) कुनै दिन अहिलेको जस्तो सफलता र प्रसिद्धि नरहन सक्छ भन्ने डर लाग्छ कि लाग्दैन ?

कुनै समय म डराउँथें । म असुरक्षित महसुस गर्थें । तर, अहिले मेरो दृष्टिकोण बदलिएको छ । सबै कुरा राम्रोसँग चलिरहेका बेला पनि मैले आफूभित्र वैचैनी र चिन्ता महसुस गर्थें । म बिनाकारण उदास हुन्थें । त्यतिबेला म कसैसँग भेट्दिनथें, बोल्दिनथें । त्यसपछि मैले महसुस गरें— जब हामीले जिन्दगीलाई खुशीपूर्वक ग्रहण गर्छौं, तब सबै कुरा सुन्दर लाग्छन् । मन खुशी हुन्छ । जिन्दगीलाई दुःखबाहेक केही ठान्दैनौं भने मन पनि उसैगरी दुःखी हुन्छ । अन्योल बढ्छ । लाग्यो— मलाई दुःख बोकेर हिँड्नु छैन । यदि मैले खुशीलाई अपनाउन सक्छु भने दुःखलाई पनि सँगै लिएर हिँड्नुपर्छ । यो महसुस भएको दिनदेखि म बिन्दास छु । मलाई असुरक्षा महसुस हुँदैन । म दुःखी र उदास हुन छाडें ।

३) यस दौरान तपाईंकी आमा कसरी ‘सपोर्ट सिस्टम’ सावित हुनुभयो ?

म उहाँबिनाको जिन्दगी कल्पना पनि गर्न सक्दिनँ । मेरो जीवनका जे–जति पनि प्राविधिक कुरा छन्, सबै जिम्मेवारी मम्मीले सम्हाल्नुहुन्छ । म त बस् खानासाना खाएर शुटिङतिर हिँडिहाल्छु, बाँकी सारा झन्झट मम्मीले बेहोर्नुहुन्छ । उहाँ मेरो ‘इमोसनल सपोर्ट’ पनि हुनुहुन्छ । उहाँ चुपचाप रहेर मलाई साथ दिनुहुन्छ । मलाई कहिल्यै पनि चिन्तित हुन दिनुहुन्न । म उहाँलाई बढीभन्दा बढी समय दिन प्रयास गर्छु । घरदेखि टाढा हुँदा जहिले पनि फोनमा कुरा हुन्छ, सधैं भिडियो कल गर्न खोज्छु ताकि उहाँलाई देख्न सकूँ !

४) तपाईंकी आमाद्वारा अभिनीत ‘नो फादर्स इन कश्मिर’ले धेरै प्रशंसा पाइरहेको छ । तपाईंले त्यो फिल्म हेर्नुभयो ?

मलाई यो फिल्म असाध्यै मन प¥यो । फिल्म सकिएर उठ्दा मेरो मन गह्रुंगो भएको थियो । मलाई यो कुराले धेरै नै छोयो कि हामी त थियटरबाट उठेर जान त जान्छौं तर फिल्मका कतिपय कुरा मनबाट हट्नै सक्दैनन् । यो फिल्ममा नयाँ दृष्टिकोण देखाइएको छ । फिल्ममा एउटा संवाद छ, “हामी त्यहाँ थिएनौं भने कसरी थाहा हुन्छ, त्यहाँ के भयो भनेर ?” मलाई लाग्छ— यो मुद्दामा संवेदनशील हुनुका साथै जिम्मेवार पनि हुनु जरुरी छ । कतिपटक हामी घर बसीबसी जे पनि बोलिदिन्छौं । हामी मुद्दामा धेरै कुरा त गर्छौं तर हामीसँग समाधान हुँदैन । यदि तपाईं कश्मिरमा हुनुहुन्थेन भने चुप लाग्नुस् । विचारमार्फत नकारात्मकता फैलाउने संस्कृति मलाई बिल्कुलै मन पर्दैन ।

५) ‘कलंक’ फिल्मको ‘गेटी ग्यालेक्सी’ गीत रिलिजका बेला बरुण धवनले भनेका थिए, “आलिया मसँग काम गर्दा असाध्यै खुशी लाग्छ किनकि उनी ठूली हिरोइन बनिसकिन् ।” साँच्चै हो ?

(हाँस्दै) वरुणले मलाई जिस्काएका हुन् । उनलाई पनि थाहा छ कि उनीसँग काम गर्ने मौका मिल्दा म कति उत्साहित हुन्छु । उनीसँग काम गर्दा मलाई असाध्यै खुशी लाग्छ । पर्दामा पनि हाम्रो जोडी सुन्दर देखिन्छ । उनले बेलाबेला जिस्काउँदै भन्ने गर्छन्, “मबिना कति धेरै काम गरिराको ? मसँग कहिले गर्ने हो ?” हाम्रो ‘दुल्हनियाँ’ सिरिजको तेस्रो फिल्म बाँकी छ । तेस्रो संस्करण आउन पनि सक्छ या त्योभन्दा अगाडि अरू पनि आउन सक्छन् । मैले वरुणलाई भनेकी छु कि वर्षमा एउटा फिल्म त सँगै गर्नैपर्छ ।

६) ‘कलंक’ फिल्मले प्रेमको वकालत गर्छ । समाजले गलत भनोस् या धर्म, उमेर आदिले । प्रेम यीभन्दा धेरै माथि छ । वास्तविक जीवनमा तपाईं कसरी प्रेममा पर्नुभयो ?

कुनै बेला म प्रेममा थिएँ । त्यतिबेला मेरा आफन्त, साथीभाइ कोही सहमत थिएनन् । उनीहरूलाई लाग्थ्यो कि यो प्रेम सही छैन । तर, म त त्यतिबेला प्रेममा थिएँ । प्रेममा हुँदा कसले अरूका कुरा सुन्छ ? प्रेमबाहेक अरू कुरा कसरी देख्छ ? ‘कलंक’मा एउटा संवाद छ, “कतिपय मान्छे प्रेममा परेर बर्बाद हुन्छन् । तर, कतिपय यस्ता पनि हुन्छन्, जो बर्बादीमा पनि प्रेम खोज्छन् ।” कथा प्रेमको हो, बर्बादीको होइन । प्रेम कलंक होइन । यो फिल्म थ्रिलर विधाको हो ।

७) प्रेमकै कुरा गर्दा— रणवीर कपुर तपाईंको जीवनमा आएपछि आफूलाई कति पूर्ण पाउनुभएको छ ? तपाईंको अनुहारमा चमक आउनुमा रणवीरको कति हात छ ?

मैले आफ्नो सम्बन्धबारे सार्वजनिक रूपमा बोलेको यो पहिलोपटक हो । पहिलो पटक मेरो अन्तरमनले भन्यो कि मैले देखावटी केही गर्नु हुँदैन । म यो विषयमा धेरै बोल्न किन चाहन्न भने यो मेरा लागि पवित्र चिज हो । रणवीर र म त्यसै कारण बाहिर सँगै घुम्दैनौं किनकि त्यसो गर्दा हाम्रो प्रेम सार्वजनिक भइदिन्छ । हाम्रो लागि यो सार्वजनिक प्रेम होइन । हाम्रा लागि यो नितान्त निजी हो । मैले संसारसामु रणवीर मेरा प्रेमी हुन् भनेर स्वीकार गर्नुको कारण हो— उनले मेरो जीवनमा नयाँ बाटो कोरिदिएका छन्, जुन पहिले कहिल्यै महसुस गरेकी थिइनँ । मैले आज त्यही महसुस गरिरहेकी छु । रणवीरको प्रेमले म पूर्ण भएकी छु । मैले आफ्नो भाषणमा पनि भनेकी थिएँ— रणवीरले मेरो अनुहारमा मुस्कान र आँखामा आभा ल्याउँछन् । योभन्दा बढी म के भनूँ ? (लजाउँदै) उनी मेरा एकदमै राम्रा साथी पनि हुन् । सम्बन्धमा असल मित्रता हुनु जरुरी छ । आफ्नो प्रेमलाई लिएर म कृतज्ञ छु त्यसैले यसबारे म खुलेर बोल्न सक्छु । मैले पूरै ब्रह्माण्डलाई भन्न चाहन्छु कि रणवीरप्रति म कति कृतज्ञ र आभारी छु !

८) बाहिर खबर यस्तो पनि आइरहेको छ कि रणवीर र तपाईंले चुपचाप स्विट्जरल्यान्ड पुगेर चुपचाप इन्गेजमेन्ट गर्नुभयो । चुपचाप बिहे पनि गर्नुभयो । साँचो हो ?

हे भगवान् ! म स्विट्जरल्यान्ड गएकी छैन । (हाँस्दै) ए अँ, हामी आकाश अम्बानीको बिहेका लागि स्विट्जरल्यान्ड गएका थियौं । अहिले म विवाह गर्दिनँ । विवाहका लागि समय बाँकी छ । कति समय छ, यो भन्नचाहिँ अप्ठ्यारो छ । तर, अहिले नै विवाहका लागि केही योजना बनिसकेको छैन । मैले पनि कतै पढेकी थिएँ— मेरो मे महिनामा विवाह हुँदै छ भनेर । यो गलत खबर हो । बिहे गर्ने बेला सबैलाई भनेरै गर्छु । यो वर्ष लगातार धेरै सेलिब्रिटीहरूको बिहे भइरहँदा मैले आफ्नो सम्बन्धबारे सार्वजनिक रूपमै स्वीकारोक्ति दिएको भएर मान्छेहरूले अनुमानमात्रै लगाएका हुन् बिहेबारे । बिहे त्यस्तो चिज हो, जुन सही समयमा गर्नुपर्छ, हुनुपर्छ । त्यसका लागि मानसिक तयारी आवश्यक हुन्छ । अहिले म आफ्नो काममा अत्यन्तै व्यस्त छु । लगातार फिल्म गरिरहेकी छु । यही वर्ष तीन फिल्म— ‘कलंक’, ‘तख्त’ र ‘ब्रह्मास्त्र’मा काम गरेकी छु ।

९) रणवीरको कुन कुरा तपाईंलाई मन पर्दैन ? उनमा के परिवर्तन चाहनुहुन्छ ?

म उनको व्यक्तित्वमा कुनै परिवर्तन चाहन्नँ । बरु उल्टै मैले आफूभित्र केही परिवर्तन ल्याउन सक्छु । उनी मलाई पूर्ण व्यक्ति लाग्छन् त्यसैले उनमा केही परिवर्तन चाहन्न । उनी जे छन्, जस्ता छन्— फस्र्ट क्लास छन् ।