काठमाडौं । सरकारले गरेको कर्मचारी समायोजनप्रति असन्तुष्टि जनाउँदै देशभरका सरकारी चिकित्सक एकसातादेखि आन्दोलनमा उत्रिएपछि सरकारी अस्पताल अस्तव्यस्त बनेका छन् । शुक्रबारदेखि अनिश्चितकालका लागि भन्दै चिकित्सक आन्दोलनमा उत्रिएपछि लाखौं बिरामीको बिचल्ली भएको छ ।

स्वास्थ्य मन्त्रालयका अनुसार चिकित्सकको आन्दोलनका कारण दैनिक ५० हजार बिरामीले स्वास्थ्य सेवा लिन पाएका छैनन् ।  काठमाडौंका वीर, ट्रमा सेन्टर, प्रसुती, कान्ती, शुक्रराजलगायतका अस्पतालमा शल्यक्रियाका लागि पालो कुरेर बसेका बिरामीले पनि सेवा पाउन सकेका छैनन् । 

वीर अस्पतालमा लगाएको साचो प्रहरी लगाएर खोलिएपछि आन्दोलनमा रहेका चिकित्सकले अस्पताल प्रांगणबाटै सेवा दिएका थिए । आज पनि अस्पतालको प्रांगणबाटै सेवा दिइरहेको सरकारी चिकित्सक संघका अध्यक्ष डा. दिपेन्द्र पाण्डेले जानकारी दिए । उनका अनुसार देशभरका सरकारी अस्पतालमा आन्दोलनमा रहेका चिकित्सकले यसैगरी सेवा प्रवाह गर्नेछन् ।