काठमाडौं । चलचित्र ‘ए मेरो हजुर–३’ की नायिका सुहाना थापा झरना थापा चलचित्र उद्योगमा नभएको भए सायद आफू यो क्षेत्रमा नहुने बताउँछिन् । झरनाकै कारण आफू चलचित्र उद्योगमा आकर्षित भएको सुहाना बताउँछिन् । नायिका तथा निर्देशक झरना थापा सुहानाकी आमा हुन् । 

“यदी ममी मुभी इन्डिस्ट्रिमा हुनुहुन्न थियो भने सायद चलचित्रमा म हुन्न थिएँ होला । यो चलचित्र उद्योगमा माथि आउन निकै गाह्रो छ । कतै कुनै मोडमा ठोक्किएर आए फरक कुरा हो नत्र आउँदिन थिएँ होला,” उनी बाह्रखरीसँग भन्छिन् । 

चलचित्रबाहेक सुहानालाई मनोविज्ञान मनपर्ने विषय हो । चलचित्रले उनलाई आकर्षित नगरेको भए आफ्नो पहिलो प्राथमिकता मनोविज्ञान हुने उनी बताउँछिन् । 
“मलाई साइकोलोजी एकदम धेरै मनपर्छ । सायद यो क्षेत्रमा नआएको भए म साइकोलोजीसँग सम्बन्धित क्षेत्रमा काम गर्थें,” सुहाना भन्छिन्, “अटिजम र बालबालिकाको क्षेत्रमा काम गर्थें ।”

सुहाना अभिनित चलचित्र ‘ए मेरो हजुर–३’ यही चैत २९ गते अल नेपाल रिलिज हुँदैछ । ‘ए मेरो हजुर–३’ सुहानाको डेब्यू मुभी हो । यसमा उनले अनमोल केसीसँग स्क्रिन सेयर गरेकी छन् ।

म्युनिकल लभ स्टोरी चलचित्र ‘ए मेरो हजुर–३’मा अनमोल र सुहानासँगै सलोन बस्नेत, अर्पण थापा, रविन्द्र झा, रुपा घिसिङ, रक्षा गौतम, विशाल पहाडी, रेअर राई, सरोज खनाल लगायत कलाकारको अभिनय छ ।