काठमाडौं । डाक्टरहरुको आन्दोलनमा कारण ६ दिनदेखि बन्द रहेको वीर अस्पतालको टिकट काउन्टर अस्पताल प्रशासनले आज प्रहरी लगाएर खोलेको छ । टिकट काउन्टर खुले पनि बिरामीले अस्पतालभित्र सेवा पाउन भने सकेका छैनन् । टिकट काउन्टर खोलिएको र बिरामीलाई सेवा दिन सबै चिकित्सकलाई आह्वान गरिएको अस्पतालका निर्देशक डा. केदार सेन्चुरीले बताए । चिकित्सक आन्दोलित भएकाले अस्पतालको प्रांगणमै भए पनि बिरामीले सेवा पाउने उनले जानकारी दिए । 

गत शुक्रबारबाट कर्मचारी समायोजनमा असन्तुष्टि जनाउँदै आएका सरकारी चिकित्सकहरुले देशैभरका सरकारी अस्पतालहरुमा आकस्मिक बाहेकका सेवा ठप्प पारेका छन् । काठमाडौंका वीर, ट्रमा सेन्टर, कान्ति बाल अस्पताल, शुक्रराजलगायतका अस्पतालमा शल्यक्रियाका लागि पालो कुरेर बसेका बिरामीले पनि सेवा पाउन सकेका छैन् ।
गोदानको आह्वानमा भएको उक्त आन्दोलनमा नेपाल चिकित्सक संघले समेत ऐक्यवद्धता जनाएको छ । चिकित्सकहरुको आन्दोलनले देशैभर दैनिक ५० हजारभन्दा बढी बिरामी प्रभावित हुने गरेको स्वास्थ्य तथा जनसंख्या मन्त्रालयले जनाएको छ । 

मन्त्रालयले चिकित्सकहरुले आन्दोलन जारी राखेमा आवश्यक सेवा सञ्चालन ऐन र अन्य प्रचलित कानुनको अधिनमा रही कारवाही प्रक्रिया अघि बयाउने चेतावनी दिएको छे । तर चिकित्सकहरु भने आफूहरुको माग पूरा नभएसम्म आन्दोलन जारी राख्ने बताउँदै आएका छन् । 

गोदानका अध्यक्ष डा. दीपेन्द्र पाण्डेले ६ दिनसम्म पनि बिरामीको स्वास्थ्यको विषयमा सरकारले चासो नदिएको भन्दै सरकारी अस्पतालको प्रांगणमा नै आकस्मिक बाहेकका सेवा दिने बताए ।