काठमाडौं । मनपरी शुल्क लिने काठमाडौंका अधिकांश निजी विद्यालयलाई काठमाडौं महानगरपालिकाले कडाइ गरेको छ ।
नयाँ शैक्षिक सत्र सुरू हुनै लाग्दा निजी स्कूलमा अधिकतम शुल्क तोक्दै महानगरपनलिले आफ्नो क्षेत्रभित्र सञ्चालनमा रहेका विद्यालयमाथि कडाइ सुरु गरेको छ ।
दुई वर्षअघिको शुल्कमा केही थप गरेर नयाँ शुल्क कायम गरिएको महानगरपालिकाले जानकारी दिएको छ । महानगरपनलिकाकी शिक्षा अधिकारी निर्मला केसीका अनुसार अनुगमन समितिले विद्यालय सञ्चालनको अवस्था र व्यवस्थालाई सूचक बनाएर विद्यालयलाई ‘क’, ‘ख’, ‘ग’ र ‘घ’ वर्गमा वर्गीकरण गरेको छ ।
विद्यालयको आफ्नै जग्गा, भवन, हातामा घेराबार, खेल मैदान पुस्तकालय, शौचालय, खेलका सामग्री, विद्यार्थी, शिक्षक संख्या र छात्रवृत्तिलाई पनि वर्गिकरणको सूचक मानिएको छ ।
यी सूचकका आधारमा विद्यालय वर्गीकरण तथा शुल्क अनुगमन समितिले विद्यालय वर्गीकरण गर्छ । महानगरपलिकाको शिक्षा नियमावलीअनुसार समितिमा शिक्षा अधिकारीको संयोजकत्वमा विषयगत प्रतिनिधित्व रहने व्यवस्था छ ।
यस समितिको फागुन २६ गते बसेको बैठकले चालु शैक्षिक सत्रको शुल्क निर्धारण गरेको हो । वर्गीकरणमा परेका विद्यालयले आफ्नो वर्गअनुसारको अधिकतम् शुल्क लिन पाउनेछन् ।
समितिले शैक्षिक सत्र २०७६ को आधारभूत तह कक्षा १ देखि ५ सम्म ‘घ’ वर्गमा पर्ने विद्यालयको अधिकतम शुल्क १ हजार ६३० कायम गरेको छ । दुई वर्षअघि यस वर्गका विद्यालयको शुल्क १ हजार १८१ रुपैयाँ थियो ।
यस्तै ‘ग’ वर्गका विद्यालयको २ हजार २४, रुपैयाँ ‘ख’ वर्गका विद्यालयको २ हजार ४१८ रुपैयाँ र ‘क’ वर्गका विद्यालयको २,८१२ रुपैयाँ तोकिएको छ । यसअघि ती वर्गका विद्यालयका लागि अधिकतम शुल्क क्रमशः १ हजार ५७५, १ हजार ९६९ र २ हजार ३६३ रुपैयाँ थियो ।
आधारभूत तहकै कक्षा ६ देखि ८ सम्म ‘घ’ वर्गका विद्यालयको अधिकतम् शुल्क १ हजार ९०१ रुपैयाँ, ‘ग’ वर्गका विद्यालयको २ हजार ३५१ रुपैयाँ, ‘ख’ वर्गका विद्यालयको २ हजार ८०१ रुपैयाँ र ‘क’ वर्गका विद्यालयको ३ हजार २५१ रुपैयाँ कायम गरिएको छ ।
यसअघि ती वर्गका विद्यालयको अधिकतम् शुल्क क्रमशः १ हजार ३५०, १ हजार ८००, २ हजार २५० र २ हजार ७०० रुपैयाँ थियो । माध्यमिक तहतर्फ कक्षा ९ र १० मा ‘घ’ वर्गमा पर्ने विद्यालयले २ हजार ५३७ रुपैयाँ अधितम् शुल्क लिन पाउनेछन् ।
यसअघि त्यस वर्गका लागि अधिकत् शुल्क १ हजार ८३८ रुपैयाँ थियो ।
फाइल तस्बिर