काठमाडौं । काठमाडौं उपत्यकाको ट्राफिक व्यवस्थापनका लागि बिहीबारबाट थप ३५० ट्राफिक प्रहरी सक्रीय भएका छन् ।

उपत्यकाको ट्राफिक व्यवस्थापन तथा प्रदुषण नियन्त्रण सुधार कार्ययोजनाअन्तर्गत महानगरीय ट्राफिक प्रहरी महाशाखाको नेतृत्वमा ठूलो संख्यामा प्रहरी सक्रीय भएका हुन् ।

महाशाखाले ट्राफिक एक्सन टिम ‘टिएटी’ समूह गठन गरेर प्रहरी परिचालन गरेको छ । जेब्राक्रस प्रयोगमा पैदलयात्रुलाई जानकारी, काठमाडौंका सबै करिडोर सञ्चालनमा ल्याउन, सवारीको धुवाँ प्रदुषणबारे निगरानी राखी कारबाही गर्न महाशाखाले बिहीबारबाट थप संख्यामा ट्राफिक प्रहरी परिचालन गरेको हो ।

बिहीबार उक्त कार्यक्रमको औपचारिक सुरुवात गर्दै नेपाल प्रहरीका महानिरीक्षक सर्वेन्द्र खनालले प्रहरीका साथमा नागरिकले हातोमालो गरेर सडक दुर्घटना न्यूनीकरण गर्नुपर्ने बताए ।

“आज हामी खासै ठूलो कार्ययोजना सार्वजनिक गर्दै छैनौं । योजना सार्वजनिक गर्दैमा सडक दुर्घटना न्यूनीकण हुने होइन । ट्राफिक प्रहरीले ल्याएका सुरक्षाका कार्ययोजनालाई सम्पूर्ण चालक र नागरिकले प्रहरीलाई साथ दिएपछि मात्र यस्ता कार्ययोजना सफल हुन्छन्,” महानिरीक्षक खनालले भने, “यसर्थ हामी सबै चालक र नागरिकको सहयोगबाट यो कार्ययोजना सफल हुने अपेक्षा गर्छौं ।”

यस योजनाले मोटरसाइकल, स्कुटीलाई सडम सुरक्षाबारे जानकारी दिने महाशाखा प्रमुख तथा एसएसपी बसन्तकुमार पन्तले बताए । “१५, २० वटा मोटरसाइकल, स्कुटी जम्मा गरेर चालकलाई लेनको ज्ञान, ओभरट्याक र सडक सुरक्षाका विषयमा सचेत गराउने छौं,” एसएसपी पन्तले बाह्रखरीसँग भने, “यो कार्ययोजनाका लागि हाललाई उपत्यकामा करिब ३५० को संख्यामा ट्राफिक प्रहरी परिचालन गरिएको छ । यो कार्ययोजनाले सडक सुरक्षाप्रति चालक सचेत हुने र सडक दुर्घटना न्यूकरण हुने विश्वास हामीले लिएका छौं ।”

यस कार्ययोजना कार्यान्वयसँगै उपत्यकामा रहेका सबै करिडोर सञ्चालनमा आउने र मुख्य सडकमा सवारीको चाप केही कम हुने उपत्यका विकास प्राधिकरणका प्रमुख आयुक्त डा. भाइकाजी तिवारीले बताए ।