काठमाडौं । प्रदेश नम्बर २ मा माध्यामिक शिक्षा परीक्षा (एसइई)को प्रश्नपत्र ‘लिक’ लगायतका कार्यमा संलग्न दुई प्रहरीसहित ६ जनामाथि प्रहरीले अनुसन्धान सुरु गरेको छ । घटनाको छानबिन गरिरहेको केन्द्रीय अनुसन्धान ब्युरो (सिआइबी)ले प्रश्नपत्र आउट गरेको आरोपमा इलाका प्रहरी कार्यालय सिरहा कल्याणपुरमा कार्यरत प्रहरी जवान ब्रह्मदेव सुनरैत र दीपेन्द्रकुमार मण्डलसहित ६ जनामाथि अनुसन्धान सुरु गरेको हो ।
प्रहरीका अनुसार प्रहरी जवान सुनरैत र मण्डलसँगै सप्तरी राजविराजका २८ वर्षीय विष्णुदेव यादव, सप्तरी राजविराज–१६ का २८ वर्षीय शिक्षक मनोज यादव, विद्यार्थी १७ वर्षीय राजेश यादव र उमेश यादव रहेका छन् ।
अनुसन्धानका क्रममा पक्राउ परेका प्रहरी जवानबाटै प्रश्नपत्र बाहिरीएको खुलेको छ । ‘‘प्रश्नपत्र राखेको कोठाको साँचो हवल्दारसँग थियो । ती प्रहरीले हवल्दारको साँचो चोरेर प्रश्नपत्रको फोटो खिचेर इमोमार्फत् आफ्नो भाइलाई पठाएको देखियो । मुख्य संलग्नता उनीहरुकै रहेछ,’ एक प्रहरी अधिकारीले भने । १४ र १५ चैतमा भएको विज्ञान र सामाजिक विषयको प्रश्नपत्र बाहिरिएको थियो ।
इप्रका, कल्याणपुरमा जनता मावि बनिया र रादु मावि कल्याणपुरको प्रश्नपत्र राखिएको थियो । प्रश्नपत्र निकालेर फोटो खिचिसकेपछि उनीहरुले इमोमार्फत् सप्तरी पठाएका थिए । त्यहीँबाट प्रश्नपत्रको किनबेच सुरु र भाइरल भएको एक अधिकारीले बताए । प्रहरी परीक्षार्थी प्रहरीबाटै अनुसन्धान सुरु गरेको थियो । विद्यार्थीले फेसबुक, भाइबर, ह्वाट्स एप ,इमो लगायतबाटै आफ्ना साथीहरुलाई प्रश्नपत्र पठाएको खुलेको छ । प्रश्नपत्र बाहिरीएपछि शिक्षा मन्त्रालयले एसईईको परीक्षा स्थगित गरेको थियो ।
फाइल तस्बिर