राष्ट्रिय प्रजातन्त्र पार्टी (राप्रपा) को महाधिवेशन स्थलमा गरिएको फोहोर विवेकशील पार्टीका कार्यकर्ताले तह लगाएछन् । घटना सानो ठाने सानै हो तर विवेक र संस्कारको कसीबाट हेर्ने हो भने कुनै राजनीतिक दल वा व्यक्तिका लागि लाजैमर्दो पनि हो । हाम्रा राजनीतिक दलहरूको महधिवेशन मूलतः चुनावमा केन्द्रित र सीमित हुन्छन् । नीति कार्यक्रम वा अरू पक्ष सीमित नेताका चासोका विषय बन्छन् । राप्रपाको महाधिवेशन पनि अपवाद नहुनु अस्वाभाविक होइन । चुनावमा सकेसम्म धेरै पर्चा छर्नु वा बाँड्नुपर्छ भन्ने मानसिकता विद्यार्थी नेतामा त छ भने राप्रपाका नेता कार्यकर्तामा नहुने कुरै भएन । त्यसमाथि व्यक्तिवादी राजनीतिमा दीक्षित पञ्चहरूको बाहुल्य भएको राप्रपामा सबै उमेदवारले पर्चा छर्न बाँड्न होडवाजी गर्ने नै भए । त्यसैले उनीहरूको महाधिवेशन स्थलमा फोहोर थुप्रिने नै भयो । त्यसरी भए गरिएको फोहोर आफैँले फालेको भए विवेकशील पार्टीले राप्रपालाई 'कुरी कुरी' गर्न पाउने पनि थिएन ।
राप्रपाको एकता महाधिवेशन अपेक्षाकृत शान्त र शालीनरूपमै सम्पन्न भयो । निर्वाचनमा पनि व्यक्तिगत लाञ्छना वा गुटगत तँछाड्मछाड्का अशोभनीय घटना ठूला दलहरूमा जस्तो बाहिर आएनन् । राप्रपाको वैचारिक पक्ष पनि बढी स्पष्टसँग प्रस्तुत भयो । यसपटक राप्रपाले आफूलाई पूर्वपञ्चहरूको संगठनमात्र हैन परिपक्व राजनीतिक दल पनि हो भन्ने सिद्ध गर्यो । तर, यति धेरै सकारात्मक उपलब्धि हुँदाहुँदै पनि सानो त्रुटिले राप्रपा संस्कारहीन दलमा दर्ता भयो । आफूले गरेको फोहोरसम्म पनि तह नलगाउनेलाई पक्कै पनि सभ्य र राजनीतिक संस्कार तथा सामाजिक चेत भएको संगठन मान्न सकिँदैन । जथाभावी फोहोर फाल्न लाज नमान्ने असभ्य प्रवृत्ति राप्रपामा पनि देखियो । राप्रपा वा समाज कल्याण परिषद्का अधिकृतले जे भने पनि फोहोर सफा गर्ने दायित्व सकारेनन् ।
प्रचार मूल्य बढी भएकाले विवेकशील नेपाली दलले राप्रपाले गरेको फोहोर सफा गरेकोमा सायद सन्देह गर्नुपर्दैन । तर, जुनसुकै मनसाय रहे पनि विवेकशीलका कार्यकर्ताले अरूले गरेको फोहोर तह लगाएका त हुन् । यसैले तिनलाई स्याबास् भन्न हिचकिचाउनु पर्दैन । साथै, राजनीतिक दलले सामाजिक दायित्व बोध पनि गर्नुपर्छ भन्ने पाठ पढाएका छन् । सत्ता वा प्रतिपक्षी दलका नेताका लागि विवेकशीलको पाठको खासै महत्त्व पनि नहोला । सहर सफा गरेर न सरकार बन्छ न ढल्छ ! तर, राजनीतिमा दायित्व बोध, क्रियाशीलता र सामाजिक उत्तरदायित्व पनि हुन्छ भने विवेकशीलको सानो प्रयासले ठूलो सन्देश दिएको मान्नुपर्छ । राजनीतिक संस्कार भए राप्रपाका नेताले विवेकशील पार्टीका कार्यकर्तालाई धन्यवाद भन्दै काठमाडौंवासीसँग क्षमा याचना गर्नु उचित हुनेछ । अरू दलका नेताले पनि अब आफूले गरेको फोहोर सफा नगरे विवेकशील पार्टीले कुरी कुरी भनिहाल्छ भनेर सतर्क हुनु जरुरी भएको छ । जनताले कुरी कुरी भन्नुभन्दा पहिले नै राजनीतिक नेता र कार्यकर्ताले जे गरे पनि हुन्छ भन्ने सामन्ती मानसिकताबाट सबै मुक्त हुनु आवश्यक छ ।
