काठमाडौं । भारतको सत्तारुढ दल भारतीय जनता पार्टीका नेता विजय जोलीले गएको फेब्रुअरी २७ का दिन संस्कृति,पर्यटन तथा नागरिक उडडयनमन्त्री रबीन्द्र अधिकारीको मृत्यु भएको घटनाको छानबिन गर्न आग्रह गरेका छन् ।
केही दिन अघि एउटा कार्यक्रममा भाग लिन नेपाल आएका उनले नयाँ दिल्ली पुगेपछि सोमबार जारी गरेको वक्तव्यमा सो कुरा उल्लेख गरिएको छ । उनले नेपालमा आएको बेलामा मन्त्री अधिकारीकी पत्नी विद्या भट्टराई र कक्षा ५ मा अध्ययनरत १० वर्षिय छोरा स्वराजलाई समेत भेटेका थिए ।
उनले नेपालमा आफूलाई नेकपाका अध्यक्ष पुष्पकमल दाहाल प्रचण्डले सम्मान गरेको जनाउँदै प्रचण्डलाई आफूले ‘मोदी है तो मुम्किन है—नमो अगेन—मै भी चौकिदार’ भन्ने पुस्तक समेत हस्तान्तरण गरेको जनाएका छन् ।
रिपोर्टर्स क्लबको बार्षिकोत्सवमा भाग लिन नेपाल आएका उनले नयाँ दिल्ली गएर पनि हेलिकोप्टर दुर्घटनाको छानबिनको विषयलाई उठाएका हुन् । उनले वक्तव्यका साथमा मन्त्री अधिकारीका परिवारलाई भेटेको तस्विरपनि सार्वजनिक गरेका छन् ।