काठमाडौं । शुक्रबार नयाँ वानेश्वर चोकमा स्कुटरलाई ठक्कर दिने सशस्त्र प्रहरीको पछुवा गाडीका चालक सन्तोष घिमिरेलाई ट्राफिक प्रहरीले कारबाही गरेको छ । शुक्रबार नयाँ वानेश्वर सडक खण्डमा भएको दुर्घटनामा संलग्न बा १ झ ९५२७ को सवारी चालकले लापरवाहीका साथ सवारी चलाएको हुँदा महानगरीय ट्राफिक प्रहरी महाशाखाले सवारी ऐन बमोजिम कारबाही गरेको हो ।
महानगरीय ट्राफिक प्रहरी महाशाखा रामशाह पथले चालक घिमिरेलाई लापरबाही सवारी चलाएको कसुरमा कारबाही गरेको हो ।
“यसअघि सशस्त्र प्रहरी र स्कुटी चालक आपसी सहमतिमा मिल्ने गरी यो केस ट्राफिकमा आएको थिएन,” महाशाखाका असई निरज थापाले भने, “त्यहाँबाट स्कुटी चालकले कारबाहीको माग राख्दै यहाँ आएपछि भेन चालक सन्तोष घिमिरेलाई कारबाही गरिएको हो ।”
चालक घिमिरेलाई पाँच सय रुपैयाँ जरिबानाको चिट थमाएको ट्राफिक प्रहरीले जनाएको छ ।