काठमाडौं । जापनीज ब्राण्ड डाटसनको ‘रेडी गो’ अर्वन क्रस कार नेपाली बजारमा भित्रिएको हो । डाटसन गाडीको नेपाली बिक्रेता पायोनियर मोटोकर्पले राजधानीमा ल्याएको हो । ‘रेडी गो’ फेमिली हृयाचब्याक कार हो । यसको मूल्य १३ लाख ९९ हजार रुपैयाँ तोकिएको छ ।

नेपाली बजारमा यो कारले हुन्डाई इओन र मारुती अल्टोसँग प्रतिस्पर्धा गर्नुपर्ने हुन्छ । यसअघि भित्रिएको डाटसन गो र गो प्लस नेपाली ग्राहकमाझ लोकप्रिय बनिसकेका छन् ।

कम मूल्यमा अत्यधुनिक फिचर भएको कार खोज्नेहरुका लागि डाटसन ‘रेडी गो’ उत्कृष्ट मोडल हो । यो कारमा ८ सय सीसी क्षमताको पेट्रोल इञ्जिन जडान गरिएको छ । यसले प्रतिलिटर २५.१७ किलोमिटर माइलेज दिने कम्पनीको दाबी छ । यसको उच्चतम गती १४० किलोमिटर प्रतिघण्टा रहेको छ ।

यसमा फाइभ स्पिड म्यानुअल ट्रान्समिसन रहेको छ । यो गाडी १५.९ सेकेण्डमै १०० किलोमिटर प्रतिघण्टाको गतिमा दौडिन सक्छ । रेडी गो कारको सबैभन्दा आकर्षक पक्ष हो, ग्राउन्ड क्लियरेन्स । यसमा १८५ मिलिमिटर ग्राउन्ड क्लियरेन्स छ । हृयाचब्याक कार भएर पनि ‘रेडी गो’मा एसयुभी कारको जत्तिकै ग्राउन्ड क्लियरेन्स रहेको निशान मोर्टस इन्डियाका उपाध्यक्ष अतुल सहनीले बताए ।

क्रस कभरमा जिप्पी ड्राइभिङको रोमाञ्चकताले यसको इन्ट्री लेवल कार सेगमेन्टलाई नयाँ रुपमा परिभाषित गर्ने वितरक कम्पनी पायोनियर मोटोकोर्पको भनाइ छ ।

रेडी गो नेपालमा विभिन्न ५ कलर सेतो, सिल्भर, ग्रे, रुबी र लाइम कलरमा उपलब्ध हुने छ । यसमा ‘युकान’ नामक जापानीज फिलोसोफी डिजाइन छ, जसले यसलाई बोल्ड बनाएको छ ।

नेपाली बजारमा निशान मोटर्स इन्डियाद्वारा उत्पादित डाटसन गाडीहरु आयात गरिँदै आएको छ । उत्कृष्ट विशेषता भएका कारण नेपाल भित्रिएको छोटो अवधिमै ग्राहकको रोजाईमा पर्न सफल भएको पायोनिर मोटोकर्पका प्रवन्ध निर्देशक सन्दीप सारदाले बताए ।