काठमाडौं । राष्ट्रिय जनता पार्टी, नेपाल र संघीय समाजवादी फोरमबीच पार्टी एकताका लागि सत्ता बाधक बनेको छ ।

गत फागुन २२ गते सरकारलाई दिएको समर्थन फिर्ता लिएको राजपाले फोरमले सरकार छाडेमात्रै एकताको वार्ता अघि बढ्न सक्ने जनाएको हो ।

“फोरमलाई सरकार प्यारो छ, मधेस र मधेसीको अजेन्डाभन्दा सत्ता प्रिय बनेपछि वार्ता अघि बढ्न सकेको छैन,” राजपाका महासचिव मनीषकुमार सुमनले बाह्रखरीसँग भने ।
गत मंसिर २३ गते राजपालगायत विचार मिल्ने पार्टीसँग एकताका लागि सहअध्यक्ष राजेन्द्रकुमार श्रेष्ठको संयोजकत्वमा उपाध्यक्ष रकम चेम्जोङ, महासचिव रामसहाय यादव, उपमहासचिव प्रकाश अधिकारी, सचिव इस्तियाक राई र राजनीतिक समिति सदस्य महेन्द्र थापा सदस्य रहेको ६ सदस्यीय वार्ता समिति गठन गरेको थियो ।

समितिले राजपा, राष्ट्रिय जनमुक्ति पार्टी, नयाँ शक्ति पार्टी, नेपाललगायत विचार पक्षधरतासँग पत्राचार गरेको फोरमका उपमहासचिव प्रकाश अधिकारी बताउँछन् ।

फोरमलगायत अन्य क्षेत्रीय र जातीय पार्टीहरूको सहकार्य र एकताका लागि चैत १ गते राजपाले पनि राजेन्द्र महतोको संयोजकत्वमा पाँच सदस्यीय वार्ता समिति गठन गरेको छ । र, फोरमले पठाएको पत्रको जवाफसमेत दिएको छ ।

विचार, मुद्दा पक्षधरताहरूबीचको एकता अनिवार्य भए पनि फोरसँग तत्काल पार्टी एकताको सम्भावना नरहेको सुमनको भनाइ छ । “पार्टी एकताका लागि सकारात्मक जवाफको अपेक्षा गर्ने हो भने तत्काल सरकारबाट फिर्ता हुनुपर्छ,” सुमनले बताए ।

फोरमले यथास्थितिवादीसँग सहकार्य गरेर देशमा यथास्थितिवादलाई मलजल गर्ने, मनोमानी गर्न उक्साउन बल पुर्‍याएको राजपाको आरोप छ । नेकपा नेतृत्वको सरकारलाई दुई तिहाइ पुर्‍याएर अग्रगमन एवं परिवर्तनकारी शक्तिलाई धम्काउने मजबुती प्रदान गर्ने काम दुर्भाग्यपूर्ण भएको राजपाको ठहर छ ।

पार्टी एकता ओठेभक्ति

सरकारले संविधान संशोधन र मधेसका मुद्दा सुनुवाई गर्न कुनै तदारूकता नदेखाए पनि सरकारमा बसिरहेकाले फोरमले एकता नचाहेको प्रष्ट हुने सुमन बताउँछन् ।

“उहाँहरू मुखले पार्टी एकता गर्नुपर्छ भन्नुहुन्छ । व्यवहार त्यसको विपरित छ । यथास्थितिमा, सरकारमै बसेर फोरमसँग हामी पार्टी एकताका लागि वार्ता-संवाद गर्दैनौँ,” उनको जोड थियो ।

राजपाले पहिचान, जाती, क्षेत्रीयतावादी विभिन्न शक्ति–समूह, राजनीतिक पार्टीसँग सहकार्य गरेर राष्ट्रिय मुक्ति आन्दोलनको तयारी गरेको छ । त्यसमा फोरमलाई आह्वान गरिएको भए पनि सरकारबाट बहिर्गमन नभएकाले थप कुरा अघि बढ्न नसकेको सुमन बताउँछन् ।