एजेन्सी । न्युजिल्यान्डको क्रिसचर्चमा गत १५ मार्चमा भएको आतङ्की हमलापछि पीडित परिवारप्रति आफ्नो दृढ संकल्प र सहानुभूतिमार्फत प्रधानमन्त्री ज्याकिन्डा एर्डनले विश्वभरका मुसलमान समुदायको मन जितेकी छन् । यसअघि प्रधानमन्त्री रहेकै बेला आमा बनेर चर्चामा रहेकी एडर्नको छवि यो घटनापछि पुनः उज्यालो हुन पुगेको हो । 

यसरी क्रिसचर्चको घटनामा एडर्नको व्यवहारले विश्वको ध्यानाकर्षण गराएको छ । हमला भएको एक हप्तामै देशको बन्दुक सम्बन्धी कानुन बदलेपछि उनी सबै राष्ट्र प्रमुखका निम्ति उदाहरणीय पात्र बन्न पुगेकी हुन् । त्यसैले संकटको घडीमा राजनीतिक हिसाबले मात्र नचलेर मानवता अनुरुप उनले देखाएको उदार व्यवहार वास्तवमै सम्मानको हकदार रहेको भन्दै विश्वको सबैभन्दा अग्लो भवन, दुबईको ब्रुज खलिफामा एर्डनको तस्बिर प्रोजेक्ट गरिएको हो ।  

दुबईका प्रधानमन्त्री सेइख मोहोम्मदले ट्वीटरमा यस्तो लेख्दै उनको निर्णयको समर्थन गरेका हुन्, “धन्यवाद छ प्रधानमन्त्री एडर्न र न्युजिल्यान्डलाई इमानदारपूर्ण सहानुभूति र समर्थनका लागि, जसले विश्वभरका मुसल्मान समुदायलाई दुःखी बनाएको आतङ्की हमलापछि १.५ अर्ब मुसलमानहरुको सम्मान जितेकी छन् ।”

ट्वीटसँगै उनले ब्रुज खलिफामा एडर्नको तस्बिर प्रोजेक्ट गरिएको समेत पोस्ट गरेका हुन् । सो तस्बिरमा एडर्नले पीडीतलाई अंकमाल गरिरहेको देखिएको छ र ‘शान्ति’ भन्ने सन्देश पनि लेखिएको छ । ८३० मिटर अग्लो ब्रुज खलिफा विश्वको सबैभन्दा अग्लो संरचना हो । 

यसरी विश्वकी सबैभन्दा कान्छि राष्ट्रप्रमुखका रुपमा चिनिएकी एडर्नको अहिले चौतर्फी प्रशंसा भइरहेको छ । शुक्रबार मृतक र पीडितहरुप्रति सहानुभूति प्रकट गर्दै उनले ‘पूरै न्युजिल्यान्ड तपाईँहरुसँगै शोकमा डुबेको छ, हामी एक हौँ’ भनेकी हुन् । त्यस्तै प्रोफेट मोहोम्मदको भनाइमा प्रकाश पार्दै उनले थप भनिन्, “आपसी सद्भाव, दया र सहानुभूतिमा विश्वास राख्ने हामी सबै एउटै शरीर हौँ । त्यसैले शरीरको कुनै एउटा भागमा चोट लाग्दा पूरै शरीरमा दुःखाइ महसुस हुन्छ ।”