काठमाडौं । नेपाली यू–१९ क्रिकेट टोलीले आफ्नो तेस्रो अभ्यास खेलमा जित हात पारेको छ । सोमबार भएको खेलमा नेपालले भारतको आन्ध्र प्रदेशको यू–१९ टोलीलाई १ विकेटले हराउन सफल भएको हो ।
नेपाललाई जित दिलाउन कप्तान रोहितकुमार पौडेलले अर्धशतकीय पारी खेलेका थिए । टस जितेर पहिले ब्याटिङ गरेको आन्ध्र प्रदेशले ४९ ओभर १ बलमा अलआउट हुँदै २२७ रन बनाएको थियो ।
आन्ध्र प्रदेशका लागि योगानन्दले ५९ र नितेस कुमारले ५१ रनको अर्धशतकीय इनिङ्स खेले ।
बलिङतर्फ नेपालका लागि कमल सिंह ऐरीले सर्वाधिक ४ विकेट लिए । त्यस्तै पवन सरार्फले ३ लिन सफल भए ।
आन्द्र प्रदेशले दिएको २ सय २८ रनको लक्ष्य पछउने क्रममा नेपालले ४७ ओभर ३ बलमा ९ विकेट गुमाउदै लक्ष्य पूरा गर्न सफल भयो ।
नेपालका लागि कप्तान रोहितले ७१ रनको योगदान दिए । त्यस्तै सार्कीले ४९ रन बनाउदा पवन सरार्फले ३० तथा सन्दीप जोराले १९ को योगदान गरे । नेपालका लागि कुशल मल्लले १३ रन जोड्न सफल भए ।
आईसीसी यू–१९ विश्वकप क्रिकेटको एसिया छनोटका लागि विशेष तयारी गरिरहेको नेपाली टोली ४ खेलको अभ्यास खेलमा ३ खेल सकिदा २–१ ले अघि छ ।
फोटो: रमण शिवाकोटी