काठमाडौं । हास्य कलाकारद्वय मदनकृष्ण श्रेष्ठ र हरिवंश आचार्यले यही फागुन १३ गतेबाट २५ गतेसम्म देशका मुख्य मुख्य १० सहरमा प्रहसन दिने भएका छन् ।
होटल एसोसिएसन अफ नेपाल (हान)ले सोमबार पत्रकार सम्मेलन गरी नेपालको आन्तरिक पर्यटन प्रवद्र्धन गर्ने उद्देश्यका साथ देशका मुख्य मुख्य १० सहरमा महयात्रा–२०७३ आयोजना गर्न लागिएको जानकारी गराएको हो । मह यात्राको सुरुवात भने पर्यटकीय सहर पोखराबाट सुरु हुनेछ । १४ गते भैरहवा, १६ गते धनगढी, १७ गते महेन्द्रनगर, १८ गते नेपालगन्ज, १९ गते बुटवल, २० गते सौराहा, २२ गते विराटनगर, २३ गते बिर्तामोड र २४ गते धरानमा मह यात्रा मेला आयोजना हुने संघले जनाएको छ ।
उठेको रकम सम्बन्धित क्षेत्रकै उद्यम, सिपमूलक तालिम, विभिन्न विद्यालय तहमा छात्रवृत्ति उपलब्ध गराउन खर्च गरिने बताइएको छ । मह यात्रामा महजोडीसहित हास्य कलाकारहरु नरेन्द्र कंसाकार, किरण केसी, शिवहरी पौडेल, राजाराम पौडेललगायत सहभागी हुने संघद्वारा सोमबार जारी विज्ञप्तीमा उल्लेख गरिएको छ ।