पत्रकारितामा लामो समय बिताएपछि इन्टरनेटमा पत्रिका चलाएर संसारभरका पाठकलाई नेपाल र नेपालीको सन्दर्भ र अन्य सामग्री प्रस्तुत गरी व्यवसायिक पत्रकारिता सुरु गर्ने अभियानअन्तर्गत बाह्रखरीको जन्म भएको हो ।
आकांक्षाको असीमित आकाश लिएर आए पनि वास्तविकतामा आधारित अपेक्षा भने अहिले पाएको सफलताभन्दा कमै थियो । हामी यो एक वर्षमा पाठक, शुभेच्छुक र विज्ञापनदाताले देखाएको विश्वास, माया र सहयोगले साँच्चिकै आल्हादित भएका छौँं । पहिलो वर्षमा पाएको यस सफलताले हामीलाई भविष्यमा अझ दृढ, झनै व्यावसायिक र जनताको हकहितप्रति अझ सशक्तरूपमा उभिन शक्ति प्रदान गरेको छ ।
लोकतान्त्रिक समाज, उदार आर्थिक र सामाजिक मूल्य मान्यताको उद्घोष गर्दै जनताको सम्पूर्ण हक अधिकारको रक्षार्थ अभिव्यक्ति स्वतन्त्रताको निडर उपयोग गर्ने हाम्रो दृढ प्रण कुनै पनि मूल्यमा कमजोर नबन्ने विश्वास दिलाउछौँ । यस मिडियाको मुख्य उद्देश्य आर्थिकरूपमा सम्पन्न बन्नु पक्कै होइन ।
तथापि, पत्रकारिताको हक हित र यस पेसामा लाग्नेको संरक्षण र सम्बद्र्धन गर्न भने आर्थिकरूपमा पनि सबल हुनैपर्छ भन्ने हाम्रो मान्यता रहेको छ । गएको एक वर्षमा यस संस्थासँग सम्बद्ध पुराना पत्रकारको मूल्य र मान्यताको आधारमा बजारले हामीलाई विश्वास गरेको कुरामा दुई मत छैन । यसबीच समाचारमा कुनै पनि प्रकारले सम्झौता नगर्ने र नैतिक अडानमा कसैसँग नदब्ने चरित्र यस संस्था आफैँले विकास गर्दै गएको हुनाले जनमानसको विश्वास बढेर गएको अनुभव गर्न पाएका छाैं । यसमा हामी आफ्नो व्यावसायिकताप्रति गर्व र जनमानसको विश्वासप्रति नमन गर्न चाहन्छौँ ।
हाम्रो समाजमा व्याप्त समस्या र कुनै पनि व्यक्ति वा संस्थाको विश्वसनीयताप्रति शंका गर्नुपर्ने वर्तमान अवस्थामा एकै वर्षमा हामीले आफूलाई प्रमाणित गर्न सकेका छौँं भनेर घमण्ड गर्दैनौ तर हामीले अपनाएका मूल्य र मान्यताले क्रमशः विश्वास आर्जन गर्दै गएकोमा प्रशन्नभने अवश्य नै छौं ।
लोकतान्त्रिक समाज र उदार व्यवस्थामा विश्वास गर्ने सबै राजनीतिक दलका हामी समर्थक हौँ तर नैतिकता, इमानदारी र समाजप्रतिको कर्तव्य बिर्सने कुनै पनि राजनीतिक व्यक्तित्व, सरकारका प्रतिनिधि, कर्मचारी, व्यापारी वा समाजका प्रतिनिधिप्रति निर्ममरूपमा प्रस्तुत हुने कलम धारण गर्ने बाह्रखरीलाई कसैले बेवास्ता नगरुन् भन्ने हाम्रो अनुरोध छ । जनताको लागि काम गरे हाम्रो समर्थन जित्नुहुनेछ भने जन विरोधी क्रियाकलापमा संलग्न कसैले पनि बाह्रखरीको बलियो प्रतिरोध सहन तयार रहनुपर्नेछ ।
राजनीतिक नेतृत्व लगामविहीन तथा नैतिकताहीन भएकाले समाजका सबै अङ्ग कमजोर बनेको सबैले महसुस गरेकै विषय हो । यस्तो अवस्थामा पत्रकारिता पनि नकारात्मक रूपमा शक्ति र सम्पत्तिको प्रभावमा परेको छ । अझ साइबर स्पेसमा जो सुकैले जे सुकै पनि लेख्न र फैलाउन सक्ने अवस्था भएकाले पनि अहिले अनलाइन मिडियामा जनविश्वासको जरा दह्रोसँग गड्न सकेको छैन । तर, अब सूचनाको माध्यम त इन्टरनेट र अनलाइन मिडियानै हो । यस क्षेत्रमै बसी जनताको विश्वास जितेर समाजलाई अघि बढाउने संकल्प लिएर आएका हाम्रो स्थापनाको पहिलो वर्षमा आत्मविश्वास बढेको छ । भविष्यमा पनि तपाईंहरूको साथ र शुभेक्षा पाइरहनेमा हामी विश्वस्त छौँं ।
धन्यवाद
प्रतीक प्रधान
प्रधान सम्पादक