काठमाडौं । चलचित्र ‘ए मेरो हजुर–३’को गीत ‘परान’ले एक दिनमा १० लाखभन्दा धेरै भ्युज बटुलेको छ । शुक्रबार दिउँसो रिलिज भएको गीतले २४ घण्टा वित्न नपाउँदै युट्युबमा १० लाखभन्दा धेरै दर्शकको साथ पाएको हो ।
२४ घण्टा नपुग्दै युट्युबमा १० लाख भ्युज बटुल्ने यो नेपाली चलचित्रको पहिलो गीत हो ।
अनमोल केसी र सुहाना थापा फिचर्ड लोक फ्लेवरको गीत ‘परान’मा शब्द आनन्द अधिकारीको छ भने स्वर अञ्जु पन्त र आशिष अभिरलको छ ।
सांगीतक प्रेमकथामा आधारित ‘ए मेरो हजुर–३’ चलचित्रमार्फत अभिनेत्री झरना थापाले छोरी सुहाना थापालाई नेपाली सिनेमा क्षेत्रमा डेव्यू गराउँदै छिन् । चलचित्रमा अनमोल र सुहानासँगै अपर्ण थापा, सलोन बस्नेत, रविन्द्र झा, सरोज खनाल लगायत कलाकारको पनि अभिनय छ ।
झरना थापा र सुमन पौडेलको कथा रहेको चलचित्र ‘ए मेरो हजुर–३’लाई झरना थापा निर्देशन गरेकी छन् । चलचित्र चैत २९ गते रिलिज हुँदैछ ।