दाङ । बहिनीलाई होली नदल्न आग्रह गर्दा दाङमा प्रहरीमाथी युवाहरुले निर्घात कुटपिट गरेका छन् ।

जिल्ला प्रहरी कार्यालय रुपन्देहीमा कार्यरत विदामा घर दाङको तुलसीपु्र उपमहानगरपालिका-१८ निवासी जितबहादुर चौधरीमाथि विहीवार युवाहरुको एक समुहले निर्घात कुटपिट गरेको हो । 

टाउको र खुट्टामा चोट रहेका घाइते चौधरीलाई तुलसीपुरका सिटी हस्पिटलमा प्रारम्भीक उपचार पछि थप उपचारको लागि नेपालगन्ज रेफर गरिएको छ । घाइते चौधरीको दिदी सीता चौधरीले बहिनी शोभामाथि १०-१२ जनाको संख्यामा आएका युवाहरुले बलजफती लखेटी लखेटी होली दल्न थालेपछि त्यसो नगर्न आग्रह गर्दा भाई माथि उनीहरुले कुटपिट गरेको जानकारी दिइन । युवाहरुको समुहले कुटपिट गरि चौधरीलाई नजिकै रहेको खोलाको पुलवाट फालिदिएको दिदी सीता चौधरीले बताइन ।

कुटपिटमा संलग्न १० जना स्थानीय युवालाई प्रहरीले पक्राउ गरेको छ । ईलाका प्रहरी कार्यालय तुलसीपुरका प्रमुख एवं डिएसपी प्रेमबहादुर शाहीले १८ बर्षीय केशर बस्नेतलाई पक्राउ गरिएको र माधव वली लगाएका युवाहरु फरार रहेको जानकारी दिए । 

११६ चालक पक्राउ 

प्रहरीले मादक पदार्थ सेवन गरेर सवारी साधन चलाउने एकसय १६ जनालाई नियन्त्रणमा लिएको छ । जसमा ९४ वटा मोटरसाईकल चालक, १२ वटा स्कुटर, २ वटा कार, ६ वटा अटो रिक्सा, २ वटा ट्याक्टरका चालकलाई पक्राउ गरिएको जिल्ला प्रहरी कार्यालय दाङका प्रहरी नायब उपरीक्षक बेलबहादुर पाण्डेले बताए । 

उच्श्रृखल गतिबिधि गर्ने ५९ र अन्य जबरजस्ती रंग लगाउनेलाई पक्राउ गरिएको हो । 

दुर्घटना हुँदा चार जना घाइते 

दाङमा दुर्घटना हुँदा चारजना घाईते भएका छन् । दाङका विभिन्‍न स्थानमा भएको दुर्घटनामा परि चारजना घाईते भएका हुन् । दाङको धारापानी, रिहार, खिलतपुर र गोग्लीमा सवारी दुर्घटना हुँदा चारजना घाइते भएका हुन् ।

घरको छतबाट खस्दा बालक घाइते
 
होली खेलेको हेर्न गएको बेला घरको छतबाट खस्दा दाङमा एक बालक घाइते भएका छन् । 

बिहीबार शान्तिनगर गाउँपालिका ३ पातेटाकुरा घर भई हाल तुलसिपुर उपमहानगरपालिका-१९ अम्रित टोलस्थित कोठाभाडामा बस्‍ने गौरी केसीका १२ वर्षीय छोरा विप्लव केसी घाईते भएको प्रहरीले बताएको छ । उनको राप्ती प्रादेशिक अस्पतालमा सामान्य उपचारपछि थप उपचारका लागि कोहलपुर रेफर गरिएको छ ।