काठमाडौं । अर्थमन्त्री डा युवराज खतिवडासँग स्वीस डेभलपमेन्ट को-अपरेशन एजेन्सीका महानिर्देशक मेनुएर सागरले शिष्टाचार भेट गरेका छन् । अर्थ मन्त्रालयमा भएको भेटमा अर्थमन्त्री डा खतिवडाले नेपालको समग्र विकास प्रयासमा स्वीस सरकारले पुर्याएको सहयोगप्रति धन्यवाद ज्ञापन गरे ।
भेटमा थप सहयोगका क्षेत्रहरुबारे छलफल समेत भएको थियो । विशेषगरी यातायात तथा सुरुङ मार्ग निर्माणको कार्यमा स्वीस सरकारको विशेष दक्षता र अनुभव रहेकोले सो प्रविधिलाई नेपालमा प्रयोग गर्न चाहेको खतिवडाले बताए । उनले नेपाल सरकारले प्रस्तावित गरेको दुई सुरुङमार्गको निर्माणलाई द्रुतगतिमा अगाडी बढाउन स्वीस सरकारसँग विशेष आग्रह पनि गरे ।
बैठकमा महानिर्देशक सागरले नेपालले राजनीतिक स्थिरता प्राप्त गर्न सफल भएको तथा नयाँ संविधान कार्यान्वयनको चरणमा भएकोमा खुशी व्यक्त गरे ।
भेटमा नेपालको भौगोलिक विविधताका कारण प्राप्त गर्न सक्ने लाभका क्षेत्रहरुमा आगामी दिनहरुमा पनि सहयोगको निरन्तरता रहने प्रतिवद्धता व्यक्त गरे ।
