काठमाडौं । सरकारका प्रवक्ता सूचना तथा सञ्चार प्रविधिमन्त्री गोकुल बास्कोटाले विप्लव समूहलाई वार्तामा बस्न आह्वान गरेका छन् ।
बिहीबार मन्त्रिपरिषद् बैठकको निर्णय सार्वजनिक गर्न आयोजित नियमित पत्रकार सम्मेलनमा मन्त्री बास्कोटाले भने, “विप्लव समूह भनेर चिनिनेसँग वार्तामा बस्न हामी सँधै तयार छौँ । हिंसा गरेर, मान्छे मार्न छाडेर, गैरकानुनी तवरले चन्दा अशुल्न छाडेर वार्तामा आए सरकारले सधैँ स्वागत गर्छ । धरपकड, गिरफ्तार गरेर सिध्याउने हाम्रो शब्दकोशमा छैन । विप्लवजी, गोलाबारुद बिसाउनूस्, जता पट्टा खेले पनि हुन्छ।”
उनले गोलबारुद बिसाएर मूलधारको राजनीतिमा आउन पनि आग्रह गरे । “यही संविधानबाटै राष्ट्रपति, प्रधानमन्त्री बन्न सकिन्छ । हतियार बोकेर हिँड्नै पर्दैन,” उनले भने, “हतियार बोकेर हिँडे रामराम भन्न सकिन्छ काँध थाप्न सकिँदैन ।”