काठमाडौं । नेकपाका प्रतिनिधिसभा सदस्य छक्कबहादुर लामाले नागरिकता स्वदेशी र विदेशी नागरिक चिन्ने महत्वपूर्ण दस्तावेज हुनुपर्ने बताएका छन् ।
हाल बन्न लागेको नागरिकता ऐनका लागि सांसदहरुबीच छलफल चलिरहँदा सांसद लामाले यस्तो बताएका हुन् ।
“नागरिकताले को स्वदेशी हो को विदेशी हो प्रष्ट छुट्याउनुपर्छ,” बिहीबार सिंहदरबारमा बसेको संघीय संसदको राज्य व्यवस्था तथा सुशासन समिति बैठकमा लामाले भने, “वंशजका आधारमा पाइने १ नम्बरको नागरिकतामा अंगिकृतले पाउने २ नम्बरको नागरिकता पर्नुहुँदैन । विदेशीले नागरिकता पाउनु हुँदैन र नागरिकता पाउनबाट कोही पनि स्वदेशी छुट्नुहुँदैन ।”
बैठकमा लामाले छिप्पिएको र कम छिप्पिएको राष्ट्रवादका आधारमा राज्यले नागरिकको नागरिकता पाउने अधिकार खोस्न नहुने बताए । नेपालमा लामो समय मूलधारको राजनीति पहाडी समुदायबाट सञ्चालन भएको हुँदा पहाडी समुदायले तराईलाई गर्ने विभेद अझै हट्ननसकेको लामाको तर्क छ ।
“अंगिकृत नागरिकताका सवालमा पहाडभन्दा तराईमा धेरै शंका छ । उत्तरतिर केही समस्या छैन, नागरिकताको समस्या दक्षिणतिर धेरै छ,” सांसद लामाले भने ।
