रोम । ५१ जना विद्यार्थी बोेकेको एउटा स्कुल बसलाई अपहरण गरेर सो बसका ड्राइभरले इटालीको मिलानमा बुधबार आगजनी गराएका छन् । केटाकेटीमध्ये कतिपयलाई भित्र बाँधेर राखिएको भएपनि झ्याल फुटाएर उनीहरुको उद्धार गरिएको प्रहरीले जनाएको छ । १४ जना बालबालिकाले धुवाँका कारण अप्ठेरो महसुस गर्नुपरेपनि कसैलाई स्वास्थ्य सम्बन्धी गम्भीर समश्या भने उत्पन्न नभएको जनाइएको छ । ड्राइभर ४७ वर्षिय इटालीका नागरिकलाई प्रहरीले गिरफ्तार गरेको छ । उनी सेनेगलका मूल बासिन्दा भएपनि लामो समयदेखि इटाली बस्दै आएका थिए । ड्राइभरले बाटोमा पुगेपछि ‘अब कोहीपनि बाँच्ने छैन’भनेर धम्क्याएका थिए ।

‘‘यो घटनामा मिराकल भएको छ । ठूलो आमहत्या हुने अवस्था रहेको थियो,” मिलानका प्रमुख अभियोजक फ्रान्केसो ग्रेसोलाई उद्धृत गर्दैै बीबीसीले जनाएको छ ।

सो बसमा चढेका एक जना शिक्षकका अनुसार सो ड्राइभरले इटालीको आप्रवासी सम्बन्धी नीतिको विरोध समेत गरेका  थिए ।

कसरी शुरु भयो यो घटना ?

दुई वटा कक्षामा पढ्ने भाइलाती दि क्रेमा स्कूलका  किशोरवयका बालबालिकाहरुलाई जिमको लागि बाहिर लगिएकोमा उनीहरुलाई नियमित रुट भन्दा अर्कै बाटो प्रयोग गरेर ड्राइभरले लगेका थिए । त्यसपछिको  झण्डै ४० मिनेटको समयमा यी सबै गतिविधि भएका हुन् । बाटोमा ड्राइभरले हातमा चक्कु लिएर विद्यार्थीहरुलाई सम्बोधन गरेका थिए । त्यही बेलामा एक जना बालकले फोनबाट घटनाक्रमको बारेमा आफ्ना बाबुआमालाई जानकारी गराए ।  त्यसपछि ती अभिभावकले प्रहरीलाई भनेपछि लगत्तै प्रहरी पुगेको घटनास्थल पुगेको थियो  । 
प्रहरीका अनुसार बसको वरपरी पेट्रोल छर्केर आगो सल्काइसकिएको थियो ।  त्यसैले यो आगो लागेर बिस्फोट हुनुअघि नै प्रहरीले बालबालिकाहरुलाई उद्धार गरेको थियो ।  मिलानका अभियोजकले सो घटना आतंकवाद समेत हुन सक्ने कुरालाई समेत ध्यान दिँदै सबै हिसाबले अध्ययन भइरहेको जनाएका छन् । 

इटालीका आन्तरिक मामिला मन्त्री माट्टेओ साल्भीनीले सो व्यक्तिको पृष्ठभूमि आपराधिक पाइएको उल्लेख गरे ।

आप्रवासी विरुद्धको कडा नीति
गएको जुन महिनामा इटालीको सत्तारुढ लिग पार्टी र पपुलिस्ट फाइफ स्टार मुभमेन्ट सत्तामा आएपछि आप्रवासीको विरुद्धमा कडा अडान राख्दै आएका छन् । त्यसले गर्दा त्यहाँ रहेका आप्रवासी रिसाइरहेको बताइँदै आएको छ ।