खेल
काठमाडौं । नेपाल क्रिकेट संघ (क्यान)को विवादबारे अनुगमन गर्न आएको अन्तर्राष्ट्रिय क्रिकेट परिषद् (आईसीसी)को टोलीले मंगलबारबाट सरोकारवालाहरूसँग भेटघाट सुरु गरेको छ । आईसीसीको तीन सदस्यीय टोलीले मंगलबार क्यानका पूर्वअध्यक्षहरू विनयराज पाण्डे र टंक आङबुहाङसँग छुट्टछुट्टै अनौपचारिक भेटघाट गर्ने कार्यक्रम छ । टोलीले उनीहरूसँग नेपाली क्रिकेटको विकास र विवादबारे छलफल गर्ने बताइएको छ ।
राष्ट्रिय खेलकुद परिषद् (राखेप)का प्रेस सल्लाहकार रोहित दाहालका अनुसार बुधबार आईसीसीको टोलीले राखेपका सदस्यसचिव केशवकुमार विष्टलाई भेट्नेछ । टोलीले युवा तथा खेलकुदमन्त्री सत्यनारायण मण्डल, पूर्व तथा वर्तमान राष्ट्रिय टिमका कप्तान तथा खेलाडीहरूसँग पनि भेट्ने कार्यक्रम छ ।
आन्तरिक कलह र राजनीतिक हस्तक्षेप भएको भन्दै आईसीसीले क्यानलाई गत वैशाख १३ गते निलम्बन गरेको थियो । त्यसपछि गत महिना स्कटल्यान्डको इडिनवर्गमा भएको आईसीसीको वार्षिक बैठकले नेपालमाथि लगाएको प्रतिबन्धलाई सदर गर्दै नेपाली क्रिकेट अघि बढाउने विषयमा प्रतिनिधिमण्डल नेपाल पठाउने निर्णय गरेको थियो । त्यहीअनुसार आईसीसीका कानुन शाखा प्रमुख पाउल म्याक्माहोन, एसिया विकास व्यवस्थापक बन्दुला बार्नापुरा र लेखा शाखाका अमर शेख नेपाल आएका छन् ।
नेपाल भ्रमण तय गरेका आईसीसीका प्रमुख कार्यकारी अधिकृत (सीईओ) डेविड रिचर्डसन र एसोसिएट प्रतिनिधि इमरान ख्वजा भने नआउने भएका छन् । नेपालमा राजनीतिक स्थिति परिवर्तन भएकाले रिचर्डसन र ख्वजाले नेपाल भ्रमण स्थगित गरेको प्रेस सल्लाहकार दाहालले जानकारी दिए ।
गत वर्ष मंसिरमा निर्वाचित क्यानको पदावधि सकिएपछि विवादले उग्र रूप लिएको हो । उपाध्यक्ष चतुरबहादुर चन्द, महासचिव अशोकनाथ प्याकुरेललगायत पक्षले मंसिरमा चुनावी साधारणसभा गर्दै चन्दको अध्यक्षतामा १७ सदस्यीय नयाँ कार्यसमिति चयन गरेका थिए । तर, त्यसलाई राखेप र अध्यक्ष आङबुहाङ पक्षले अवैधानिक बताउँदै आएको थियो ।
विवादपछि राखेपले गत पुसमा रमेश सिलवालको अध्यक्षतामा क्यानको १५ सदस्यीय तदर्थ समिति गठन गरेको थियो । चन्दलगायतले सो तदर्थ समितिविरुद्ध सर्वोच्च अदालतमा मुद्दा हालेपछि अदालतले दुवै पक्षलाई काम कारबाही नगर्न अन्तरिम आदेश जारी गरेको थियो । यो मुद्दाको अहिलेसम्म किनारा लागेको छैन ।
त्यसपछि क्यानमा अन्तरिक कलह र राजनीतिक हस्तक्षेप भएको भन्दै आईसीसीले प्रतिबन्ध लगायो । क्यानलाई प्रतिबन्ध लगाए पनि आईसीसीले नेपाली क्रिकेट टिमलाई भने खेल्न अनुमति दिएको छ । नेपाली टोलीले अहिले विश्व क्रिकेट लिग च्याम्पियनसिप खेलिरहेको छ । नेपालले नेदरल्याण्डसँग साउन २९ र ३१ गते उसैको मैदानमा खेल्नेछ । विश्व क्रिकेट लिग च्याम्पियनसिपमा तेस्रो चरणको खेल सकिँदा नेपाल नेपाल छैटौं स्थानमा छ ।
प्रकाशित मिति: मंगलबार, साउन ११, २०७३ १३:५८
प्रतिक्रिया दिनुहोस्