काठमाडौं । काठमाडौंमा अनधिकृत रुपमा पार्किङ गरी राखिएका मोटरसाइकल कारबाहीको जरिवाना संकलन पारदर्शी हुन सकेको छैन । कारबाहीमा परेका मोटरसाइकल चालकबाट महानगरपालिकाको नगर प्रहरीले प्रतिमोटरसाइकल १ हजार रुपैयाँ जरिवाना उठाउने गरेको छ ।
मोटरसाइकल चालकलाई गरिने जरिवाना रकम बैंकमा जम्मा गर्ने व्यवस्था महानगरपालिकाले मिलाउन नसक्दा उक्त शीर्षकमा उठेको राजश्व हिनामिना हुने जोखिम देखिएको छ ।
महानगरपालिकाका मेयर विद्यासुन्दर शाक्यले चुनावी मैदानमा रहँदा काठमाडौंलाई ‘स्मार्ट सिटी’ बनाउने घोषणा गरेका थिए । उक्त घोषणाको डेढ वर्ष बित्न लाग्दा पनि महानगरपालिकाले राजश्व संकलनलाई बैंकिङ प्रणालीमा लान सकेको छैन ।
“अनधिकृत पार्किङको जरिवाना बिल काट्ने सिस्टमबाटै उठाइरहेका छौं,” महानगरपालिकाका प्रवक्ता ईश्वरमान डङ्गोलले बाह्रखरीसँग भने, “एउटा मोटरसाइकलबाट १ हजार रुपैयाँको बिल काट्ने व्यवस्था छ ।” अनधिकृत पार्किङ शीर्षकमा राजश्व काटेको बिल बुक कारणवश हराएमा वा नष्ट भएमा नगर प्रहरीले संकलन गरेको राजश्वको हिसाब नै हराउने खतरा छ ।
रामशाहपथ बग्गीखानामा रहेको नगर प्रहरी पोष्टमा रहेका नगर प्रहरीले जरिवाना काटेको बिल महानगरपालिकामा बुझाएका आधारमा महानगरपालिकाले अनधिकृत पार्किङबाट संकलन भएको राजश्वको हिसाब राख्ने गरेको छ ।
महानगरपालिकाको सहरी सुव्यवस्था विभागले जानकारी दिएको यही माघसम्मको अर्धवार्षिक तथ्यांकअनुसार अनधिकृत पार्किङ गरेका मोटरसाइकल कारबाहीबाट महानगरपालिकाले ४७ लाख ४० हजार राजश्व संकलन गरेको छ ।
महानगरपालिका नगर प्रहरी नायव निरीक्षक श्याम तिम्सिनाका अनुसार दैनिक ६० देखि ८० वटा अनधिकृत पार्किङमा राखिएका मोटरसाइकल कारबाहीमा पर्ने गरेका छन् । “जथाभावी पार्किङ व्यवस्थित गर्नका लागि १७ जना नगर प्रहरीको दरबन्दी भए पनि अहिले १२ जनाको टोलीले २ वटा ट्रकमा काठमाडौंका विभिन्न स्थानबाट जथाभावी पार्किङ गरी राखिएका मोटरसाइकल उठाएर कारबाही गर्दै आएका छौं । आवश्यक संख्यामा ट्राफिक प्रहरीबाट पनि सहयोग लिने गरेका छौं,” तिम्सिनाले भने, “स्थानीय जनता, ट्राफिक, नेपाल प्रहरी र वडा कार्यालयले दिएको सूचनाका आधारमा हामीले यस्तो कारबाही गर्दै आएका छौं । विशेषगरी बानेश्वर, पुतली सडक, न्युरोड, मखन र वीर हस्पिटलअगाडि जथाभावी मोटरसाइकल पार्किङ भेटिने गरेको छ ।”
