क्यानबेरा । न्यूजील्याण्डमा गएको शुक्रबार गोली प्रहार गरेर ५० जनाको हत्या गर्ने युवाको अष्ट्रेलियास्थित निवासमा प्रहरीले खानतलासी गरेको छ । उनको निवास सिड्नीबाट ६०० किमी उत्तरमा रहेको छ । 
ब्रेन्टोन टारान्ट नामका २८ वर्षिय ती युवाको बारेमा छानबिनका लागि मद्दत पुग्ने ठानेर सो खानतलासी गरिएको जनाइएको छ । उनकी दिदीले खानतलासीमा मद्दत गरेकी थिइन् ।
उनका परिवारका सदस्यहरुले सो घटना सुनेर आफूहरु आश्चर्यचकित भएको जनाएका छन् । उनका काका टेरी फिट्जगराल्डले नाइन न्यूजसँगको कुराकानीमा त्यो घटनाका लागि परिवारको तर्फबाट क्षमा मागेका छन् । 
परिवारका सदस्यहरुले उनले त्यस्तो गर्लान् भन्ने कहिले पनि नठानेका जनाएका छन् । उनी भिडियो गेम खेलिरहने बानीका थिए । सन् २०१० मा उनका पिताको मृत्यु भएपछि उनी विश्वभ्रमण गर्ने भन्दै निस्केका थिए । तर, तथ्यहरुले भने उनी दुई वर्षदेखि त्यस खालको आक्रमणको तयारीमा रहेको जनाइएको छ ।
(बीबीसी तथा अन्य एजेन्सी)