काठमाडौं । काठमाडौंको सिनामंगलस्थित शारदाचोकमा रहेको अवतार ह्युमन रिसोर्सेस कम्पनीका कार्यकारी निर्देशक दिलराम भुजेलले बाह्रखरीकर्मीलाई ज्यान मार्ने धम्की दिएका छन् ।  अवतार ह्युमन रिसोर्सेस कम्पनीबाट कतार पुगेकी कञ्चनपुरकी माया तामाङ अलपत्र परेको विषयमा समाचारको जानकारी लिन खोज्दा उनले ज्यान मार्ने धम्की दिएका हुन् ।

उनको ९८०१००३५०३ मोबाइल नम्बरमा यसबारे बुझ्न खोज्दा बाह्रखरीकर्मी केशवराज जोशीलाई ‘तैँले जे गर्न सक्छस् गर् । पैसा खान खोज्ने खाते पत्रकार’ भन्दै अश्लिल शब्द प्रयोग गरेका थिए ।  काठमाडौं प्रहरी परिसरका एसएसपी वसन्त लामाले पत्रकारलाई धम्की दिने र दुर्व्यवहार गर्ने भुजेललाई कानुनी दायरामा ल्याइने बताए । 

सिन्धुपाल्चोक स्थायी घर भएकी माया तामाङ ६ महिनाअघि अवतार ह्युमन रिसोर्सेस कम्पनीबाट १ लाख रुपैयाँ तिरेर कतार पुगेको मलेसियामा रहेका मायाका श्रीमान रामबहादुर सिंहले बताए ।  मायालाई कतारमा अस्पतालमा काम दिने म्यानपावर कम्पनीले आश्वासन दिएको थियो ।

कतारको एक हजार रियाल दिने भनेर त्यहाँ पुर्याइएको भए पनि त्यहाँ पुगेपछि मायालाई घरेलु कामदारको रुपमा राखिएको श्रीमान सिंहले बताए ।  कतारमा रहँदा अवतार ह्युमन रिसोर्सेस कम्पनीकै सम्र्पकमा रहेका पासाङ तामाङले मायालाई दुर्व्यवहार गरेको, कम्पनीलाई पछिल्लो दुई महिनाको तलब नदिन भनेको समेत श्रीमानले बताए ।

मायाले कतारस्थित नेपाली दुतावासमा निवेदनसमेत दिएकी छन् ।  मायाले काम गरेको तलब माग्दा उल्टै जेल हाल्ने धम्की दिएको श्रीमान रामले बताए ।  माया आइतबार नै कतारस्थित नेपाली दूतावासमा शरणका लागि पुगेकी थिइन् । ‘‘म नेपाल फर्किन चाहन्छु । यहाँ मेरो ज्यान जोखिममा छ । एउटा काम भनेर अर्कै काम लगाइयो,” मायाको भनाई उद्धृत गर्दै उनका श्रीमान रामले भने ।

नेपाली दुतावासले माया कार्यरत कम्पनीलाई पासपोर्ट फिर्ता दिन पत्र समेत पठाएको थियो ।  तर मायालाई पासपोर्ट नदिने जे सक्छौ गर भन्दै पासाङ तामाङले धम्की दिएको रामले बताए ।