द्रौपदीले भनेकी छन्— बदला सधैं सही हुँदैन । तर, माफ गर्नु पनि सधैं सही हुँदैन ।

यही संवादको वरिपरि घुमेको छ– सुजोय घोषको ‘बदला’ । सुजोयको यो सस्पेन्स थ्रिलर स्पेनी फिल्म ‘द इन्भिजिवल गेस्ट’को आधिकारिक रिमेक हो । जसले मूल फिल्म हेरेको छैन, उनीहरूलाई ‘बदला’को सस्पेन्स, थ्रिल र जबर्जस्त प्रस्तुतिले २ घण्टासम्म बाँधिराख्छ । जसले ‘द इन्भिजिवल गेस्ट’ हेरेको छ, उनीहरूलाई पनि यसले निराश बनाउँदैन ।

कथा हो— प्रसिद्ध व्यवसायी नैना सेठी (तापसी) पन्नुको, जसलाई एक हत्याको अभियोग लागेको छ । उनले आफ्ना कानुनी सल्लाहकार मानव कौलमार्फत प्रतिष्ठित र चर्चित वकिल बादल गुप्ता (अमिताभ बच्चन)लाई आफ्नो मुद्दामा अनुबन्ध गर्छिन् । बादल गुप्ता प्रमाणमा यति सशक्त रूपले काम गर्छन् कि यही कारण आफ्नो ४० वर्षे करिअरमा उनले एउटा पनि मुद्दा हारेका हुँदैनन् । नैनामाथि अनुसन्धान गर्दा उनले थाहा पाउँछन् कि उनको अर्जुन (टोनी ल्युक) नामक युवकसँग प्रेम सम्बन्ध छ । यद्यपि नैनाले यसलाई गल्ती मान्छिन् । आफूलाई ब्ल्याकमेल गरिएको र हत्यामा योजनाबद्ध रूपले फसाइएको तथा आफूले केवल पति र छोरीलाई प्रेम गर्ने बताउँछिन् । सोधपुछ र कुराकानीका क्रममा रानी (अमृता सिंह) र उनका पतिजस्ता अरू कलाकारको पदार्पण हुन्छ, जसले यो मुद्दालाई पूरै घुमाइदिन्छन् । के बादल आफ्नो अनवरत अपराजयलाई कायम राख्न सफल हुन्छन् ? के उनले नैनालाई निर्दोष सावित गर्न सक्लान् ? यसका लागि फिल्म हेर्नैपर्ने हुन्छ ।

जहाँसम्म निर्देशनको सवाल छ, सुजोयले सस्पेन्स थ्रिलरको रूपमा ‘द इन्भिजिवल गेस्ट’जस्तो उत्कृष्ट फिल्म रोजे । तर, रिमेक गर्दा उनले यसलाई थिएट्रिकल हुनबाट जोगाउन सकेनन् । फिल्मको पटकथा अझै कसिलो हुनुपथ्र्यो । यसका बाबजुद फिल्मले सस्पेन्स जोगाइराख्छ । यो फिल्म दुई मुख्य पात्र— तापसी र अमिताभको आँखाबाट बनाइएको हुँदा धेरै ठाउँमा दोहोरिएको भान हुन्छ तर फिल्मले बोर गर्दैन । जटिल कथा सुजोयलाई बढी मन पर्छन् । यहाँ पनि पात्रमार्फत कथालाई जटिल बनाउन उनी सफल छन् । तर, ‘बदला’को प्रिक्लाइम्याक्समा क्लाइम्याक्सको अन्दाज भइसक्छ, जुन मूल स्पेनी फिल्म हेर्दा हुँदैन । यस्तो हुनु हुँदैनथ्यो ।

तर, यति भन्दाभन्दै पनि यो फिल्म ‘द इन्भिजिवल गेस्ट’को रिमेक हो भन्ने तथ्यले खासै फरक पार्दैन । अमिताभ बच्चन र तापसी पन्नुको प्रस्तुतिले यसलाई विशिष्ठ र मौलिक बनाएको छ । यो फिल्म नैना र बादलबीचको कसिलो संवादमा अडिएको छ । दुईबीचको कुराकानी र अन्तक्र्रियाले दर्शकलाई एकदमै अँठ्याइराख्छ । ‘बदला’को सम्पूर्ण आवरण एक आरोपी र वकिलबीचको संवाद हो ।

निर्देशक सुजोय र सहलेखक राज वसन्तले यो फिल्मलाई भारतीय सन्दर्भमा उतार्न धेरै नै मेहनत गरेका छन् । महाभारतको सन्दर्भ पनि पेचिलो गरी राखिएको छ । केही संवाद दोहोरिएको लागे पनि पात्रको भावना र परिस्थितिलाई मध्यनजर गर्ने हो भने त्यसलाई नजरअन्दाज गर्न सकिन्छ । लगातारको फ्ल्यासब्याक सिक्वेन्सले बेलाबेला दर्शकलाई अलमलमा पारिदिन्छन् ।

अमिताभलाई यो शताब्दीकै महानायक यसकारण मानिन्छ कि उनले चरित्रको अन्तर्य र उसको प्रस्तुतिलाई मात्रै सटिक ढंगले बुझ्दैनन् कि आफूअगाडिको कलाकारलाई पनि उत्तिकै सबल तरिकाले आत्मसात गरेर अभिनयको सिलसिला कायम राख्छन् । ‘बदला’मा पनि उनले पात्रका हरेक कोणलाई जबर्जस्त बुझेर काम गरेका छन् । तापसी पन्नु अभिनेतृको रूपमा महानायकको सामुन्ने थोरै पनि भयभीत देखिँदैनिन् । यो कुरा उनले ‘पिंक’मा पनि प्रमाणित गरिसकेकी छन्, जहाँ उनी अमिताभसँग पहिलोपटक आमनेसामने थिइन् । नैनाको रूपमा उनले चरित्रको निर्दोषपनालाई सुन्दर ढंगले निभाएकी छन् । नैनाको जीवनमा थुप्रै त्यस्ता गिर्खाहरू छन्, जुन कथा अघि बढ्दै जाँदा खुल्दै जान्छन् । तापसीले यी सबै अवस्थामा आफूलाई सुन्दर ढंगले प्रस्तुत गरेकी छन् ।

सिनेम्याटोग्राफर अविक मुखोपाध्यायले विषयअनुसार फिल्मको टोनलाई बचाएका छन् । अमृता सिंहलाई पर्दामा दमदार प्रस्तुतिका साथ हेर्दा आनन्द लाग्छ । मानव कौलले यो भूमिकामा काम किन गरे, बुझ्न सकिन्न । किनकि उनको हिस्सामा गर्नेजस्तो केही काम थिएन । दक्षिण भारतीय कलाकार टोनी ल्युक अर्जुनको रूपमा ठीकठाक देखिन्छन् तर उनको लवज खड्किन्छ । मोनिसा आर बल्दावाको सम्पादन र क्लिन्ट सेरेजोको ब्याकग्राउन्ड स्कोरले फिल्मको मर्मलाई बचाएका छन् ।

सुजोय घोष जटिलखाले थ्रिलर बनाउन पोख्त छन् । ‘कहानी’ र ‘कहानी–२’ जस्ता सस्पेन्स थ्रिलर बनाइसकेका सुजोयले ‘बदला’मा पनि आफ्नो अन्दाजलाई कायम राखेका छन् । समग्रमा दर्शकको धड्कन बढाउन ‘बदला’ले कुनै कसर बाँकी राखेको छैन ।