काठमाडौं । मलेसियामा अप्रिल १० देखि सुरु हुने आइसीसी यु-१९ विश्वकप अन्तगर्त एसिया छनोटको तयारीका लागि भारत भ्रमणमा जाने नेपाली क्रिकेट टोलीको घोषणा भएको छ।
रोहित कुमार पौडेलको कप्तानीमा १८ सदस्यीय टोली घोषणा भएको हो। भ्रमण जानु एक दिनअघि शुक्रबार प्रशिक्षक बिनोद दासले टोली घोषणा गरेका हुन्। रोहितको कप्तानीमा घोषित टोलीमा मोहमद आसिफ शेख, पवन सरार्फ, सन्दीप जोरा, भिम सार्की, रबि कुमार शाह, रित गौतम, कमलसिंह ऐरी, रासिद खान र सागर ढकाल छन्।
यस्तै अभिशेक बस्नेत, कुसल मल्ल, हरि बहादुर चौहान, प्रतिस जिसी, आकाश चन्द, सुर्य तामाङ, लोकेश बहादुर मल्लले पनि टोलीमा स्थान बनाएका छन्। नेपालले भारत भ्रमणमा आन्द्रा प्रदेश क्रिकेट टोलीसँग ४ अभ्यास खेल खेल्नेछ। अभ्यासपछि १४ सदस्यीय क्रिकेट टोलीको घोषणा गर्ने प्रशिक्षक दासले बताए। अभ्यासका क्रममा ब्याटिङ कन्सलटेन्ट अपूर्व देशाइले नेपाली टोलीलाई प्रशिक्षण गर्नेछन्। नेपाली टोली शनिबार दिउँसो २:४० बजे भारत प्रस्थान गर्नेछन्।