काठमाडौं । नेपालमा केही समययता बन्द र विरोध प्रदर्शन जस्ता कार्यक्रम हुन थालेपछि मित्र राष्ट्रहरुले ट्राभल एडभाइजरी जारी गरेर नेपाल भ्रमण गर्दा सतर्क रहन आफ्ना नागरिकहरुलाई आग्रह गर्न थालेका छन् । सोही क्रममा बेलायतले नेपाल भमणमा रहेका बेलायती नागरिकलाई सतर्क रहन आग्रह गर्दै बिहीबार नयाँ ट्राभल एडभाइजरी जारी गरेको छ । 
खासगरी नेत्रविक्रम चन्द ‘विप्लव’ नेतृत्वको नेकपाद्वारा आयोजना गरिएको नेपाल बन्दमा केन्द्रीत रहेर जारी गरिएको ट्राभल एडभाइजरीमा बाहिर निस्कँदा सुरक्षाकर्मीको सल्लाह लिन र मुख्य सडकमात्रै प्रयोग गर्न आग्रह गरिएको छ । सो एडभाइजरीमा राजनीतिक हिसाबका प्रदर्शन भइरहेको र हड्ताल जस्ता गतिविधि नेपालमा सामान्य भएको जनाउँदै त्यस्ता गतिविधि छोटो सूचनाकै आधारमा हुन सक्ने तथा कानुन कार्यान्वयन निकाय र प्रदर्शकारीबीच जुनसुकै बेलामा झडपको अवस्था आउन सक्ने जनाइएको छ । 
वक्तव्यमा प्रदर्शनबाट जोगिन समेत आग्रह गरिएको छ । स्थानीय समूहले व्यापारिक समुदायमाथि चन्दा असुलीको कार्य अघि बढाइरहेको जनाउँदै  एडभाइजरीमा चन्दा असुल्ने कार्य गैरसरकारी निकाय र स्थानीय तथा अन्तर्राष्ट्रिय विद्यालयमा समेत हुने बताइएको छ । 
गएको फेब्रुवरी र मार्च महिनामा काठमाडौंमा नै विस्फोटक पदार्थ प्रयोग गरिएको जनाउँदै एडभाइजरीमा त्यसमा एक जनाको मृत्यु भएको तथा केही घाइते भएको समेत उल्लेख गरिएको छ ।
नेपाल भूकम्पको प्रमुख क्षेत्रमा रहेको र सानातिना भूकम्प गइरहन सक्ने जनाउँदै सो सम्बन्धी सुरक्षा सतर्कता अपनाउन समेत आग्रह गरिएको छ ।  नेपालमा मनसुन जुन देखि सेप्टेम्बरसम्म रहने जनाउँदै सडक यातायात खासगरी दुर्गम क्षेत्रमा नेपालमा खतरापूर्ण हुन सक्ने जनाइएको छ । 
नेपालका सबै विमान कम्पनीलाई युरोपेली संघ (इयु)का राष्ट्रमा अनुमति नरहेको जनाउँदै एडभाइजरीमा रातिको समयमा नेपालमा नहिँड्न समेत सचेत गराइएको छ । वायु प्रदूषणसमेत व्यापक रुपमा रहेको समेत बेलायतले जनाएको छ । आतंककारी समूहका गतिविधि पनि हुन सक्ने भएकोले सतर्कता अपनाउन आग्रह गर्दै नेपाल जानुअघि विस्तृत रुपमा ट्राभल एण्ड मेडिकल इन्सुरेन्स गराउन आग्रह गरिएको छ ।
संस्कृति पर्यटन तथा नागरिक उडडयन मन्त्रालयका एक अधिकारीले बाह्रखरीसँगको कुराकानीमा बन्द–हड्ताल जस्ता गतिविधिले देशको पर्यटन क्षेत्रलाई नकारात्मक असर पर्ने बताए । 
नेपालले सन् २०२० मा २० लाख पर्यटक भित्र्याउने लक्ष लिएको छ । तर, देशमा आन्तरिक द्वन्द्वका घटना बढ्दा त्यसले पर्यटन क्षेत्रलाई अप्ठेरो पार्ने अवस्था देखिएको  उनले बताए ।
उता पर्यटन विभागका महानिर्देशक डुण्डुराज घिमीरेले भने बन्द लगायतका गतिविधिहरु राजनीतिक कारणले भइरहेकाले आफूले ती विषयमा बोल्न नमिल्ने अवस्था भएको बताए ।

तस्बिर: रासस