एजेन्सी । च्याम्पियन्स लिग अन्तर्गत प्रि–क्वाटरफाइनलका खेलहरुमा धेरै अप्रत्यासित नतिजा देखिए । च्याम्पियन्स लिगमा प्रि–क्वाटरफाइनल चरणका खेलहरु सकिँदा बार्सिलोना, लिभरपुल, टोटेनहम, म्यान्चेस्टर युनाइटेड, म्यान्चेस्टर सिटी, आयाक्स, युभेन्ट्स र पोर्टाेले क्वाटरफाइनलमा स्थान बनाउन सफल भए । 
यो सिजन साविक विजेता रियल मड्रिड अन्तिम १६ बाट बाहिरिएको थियो । उता युनाइटेडले आफ्ना सिनियर खेलाडी विना नै बलियो मानियको पेरिस सेन्ट जर्मेनविरुद्ध अप्रत्यासित नतिजा निकाल्दै क्वाटरफाइनलमा स्थान बनाउन सफल भयो । 
त्यस्तै स्टार खेलाडी क्रिस्टियानो रोनाल्डोको टोली युभेन्ट्स पनि अन्तिम १६ को दोस्रो लेगमा उत्कृष्ट कमब्याक गर्दै क्वाटरफाइनलमा स्थान बनाइसकेको छ । अन्तिम १६ का सम्पूर्ण खेल सकिँदा निस्केका रोमाञ्चक पाँच नतिजाको चर्चा गर्दैछौं । 

५) बार्सिलोनाविरुद्ध लियोन 
स्पेनिस क्लब बार्सिलोले लियोनसँग प्रि–क्वाटरफाइनको पहिलो लेग बराबरी खेलेको थियो । दोस्रो लेगमा भेन बार्सिलोनाले सहज जित निकाल्न सफल भयो । बुधबार राति भएको प्रि–क्वाटरफाइनल दोस्रो लेगमा बार्सिलोनाले लियोनलाई ५–१ अन्तरले पराजित गरेको हो । 
अपेक्षित रुपमा बार्सिलोनाले जित हात पारेपनि सामान्य गोल अन्तरले क्वाटरफाइनलमा स्थान बनाउने सबैको बुझाइ थियो । तर बुधबारको नतिजा भने अलि फरक देखियो । बार्सिलोनाका लियोनल मेस्सीले उत्कृष्ट प्रदर्शन गरे । खेलमा मेस्सीले दुई गोल र दुई असिस्ट गरे । 
योसँगै बार्सिलोनाले क्वाटरफाइनलमा स्थान बनाएको हो । 

४) म्यान्चेस्टर सिटीविरुद्ध साल्के 
च्याम्पियन्स लिग फुटबलको अन्तिम १६ को दोस्रो लेगमा म्यान्चेस्टर सिटीले रोमाञ्चक नतिजा निकाल्न सफल भयो । 
सिटीले ७–० गोलको फराकिलो अन्तरले जित निकाल्यो । प्रिमियर लिगको शिर्ष स्थानमा रहेको सिटीले समग्रमा १०–२ गोलको जित निकाल्न सफल भएको थियो । सिटीले पहिलो लेगको खेलमा ३–२ को अग्रता लिएको थियो ।
प्रिमियर लिगको प्रि–क्वाटरफाइनलमा आएको यो सबैभन्दा रोमाञ्चक नतिजा हो । पहिलो र दोस्रो लेगमा सिटीका सर्जियो अग्युरो र रहिम स्ट्रलिङ नायक बनेका थिए । 

३) युभेन्ट्सविरुद्ध एट्लेटिको मड्रिड 
स्टार स्ट्राइकर क्रिस्टियानो रोनाल्डोको टोली युभेन्ट्स च्याम्पियन्स लिगको प्रि–क्वाटरफाइनलको दोस्रो लेगमा उत्कृष्ट कम ब्याक गर्न सफल भयो । मंगलबार राति भएको खेलमा युभेन्ट्सले एट्लेटिको मड्रिडलाई ३–० गोलले हराउँदै क्वाटरफाइनलमा स्थान बनाउन सफल भएको हो । 
पहिलो लेगमा २–० गोलले पछि परेको युभेन्ट्सले दोस्रो लेगमा ३–० को जित निकाल्न सफल भयो । मंगलबारको खेलमा नै रोनाल्डोले च्याम्पियन्स लिगमा आफ्नो आठौँ ह्याट्रिक पूरा गरे । युभेन्ट्सका लागि रोनाल्डोले खेलको २७ औँ मिनेटमा पलिहो गोल गर्दा खेलको ४९ औँ मिनेटमा दोस्रो तथा खेलको ८६ औँ मिनेटमा पेनाल्टी मार्फत गोल गर्दै युभेन्ट्सलाई क्वाटरफाइनलसम्म पुर्याए । 

२) पीएसजीविरुद्ध म्यान्चेस्टर युनाइटेड 
च्याम्पियन्स लिगको प्रि–क्वाटरफाइनल खेलमा तुलनात्मक रुपमा कमजोर मानिएको म्यानचेस्टर युनाइटेडले  पेरीस सेन्ट जर्मेन (पीएसजी) लाई ३–१ गोलले हराउँदै क्वाटरफाइनलमा स्थान सुरक्षित गर्न सफल भयो । 
दुबै टोलीबीचको पहिलो र दोस्रो लेगको गोल समग्रमा ३–३ को बराबरी भएपछि युनाइटेडले अवे गोलका आधारमा अन्तिम आठमा स्थान बनाएको थियो । पहिलो लेगमा २–० गोलले पछि परेको युनाइटेड आफ्ना स्टार खेलाडी विना नै मैदान प्रवेश गरेको थियो । 
पीएसजीको घरेलु मैदानमा भएको खेलमा युनाइटेडलाई आफ्ना स्टार खेलाडी विना नै दोस्रो लेगमा कम ब्याक गर्न चुनौती थियो । तर पनि युनाइटेडलाई जित दिलाउन रोमेलु लुकाकुले दुई र मार्कुस सारफोर्डले एक गोल गर्दै क्वाटरफाइनलमा स्थान सुरक्षित बनाए । 

१) रियलविरुद्ध आयाक्स 
च्याम्पियन्स लिगमा १३ पटकको च्याम्पियन रियल यस सिजन अन्तिम १६ बाट नै बाहिरिन पुग्यो । च्याम्पियन्स लिगको प्रि–क्वाटरफाइनल पहिलो लिगमा आयाक्सविरुद्ध २–१ गोलले विजय भएको रियल दोस्रो लिगमा भने ४–१ गोलले पराजित भएको थियो ।
 
पहिलो लेगमा रियल मड्रिड २–१ गोलले अघि थियो । च्याम्पियन्स लिगको सर्वाधिक विजेता टोली रियल यस सिजन प्रि–क्वाटरफाइनलबाट बाहिरिदा च्याम्पियन्स लिगमा केही रोमाञ्चकता हराएको छ ।
साविक विजेता टोली नै अन्तिम १६ बाट बाहिरिदा आयाक्सले लामो समयपछि क्वार्टरफाइनलमा प्रवेश गर्न सफल भएको थियो । पछिल्लो समय कमजोर भएको रियल यो सिजन कोपा डेल रेको सेमिफाइनल खेलमाबाट पनि बाहिरिएको थियो । पहिलो लिगमा बार्सिलोनाविरुद्ध १–१ गोलको बराबरी खेलेको रियलले दोस्रो लिगमा ३–० गोलले पराजित भएको थियो ।
रियल यो सिजन ला–लिगाको लिग लिडर बार्सिलोनाभन्दा १२ अंकले पछि छ ।