एजेन्सी । गत डिसेम्बरमा हलिउड सेलिब्रेटी निक जोनससँग वैवाहिक बन्धनमा बाँधिएकी अभिनेत्री प्रियंका चोपडाले मंगलबार सरप्राइज स्वरुप करिब २ लाख डलरको मर्सिडिज गाडी प्राप्त गरेकी छन्। प्रियंकाले आफ्नो उपहारबारे सामाजिक सञ्जाल इन्स्टाग्राममा पोस्ट गरेपछि यसबारे अधिक चर्चा भइरहेको छ।
  
पोस्टमा जोनस र प्रियंका दुवै नयाँ कारका अगाडि हाँस्दै खुसी मनाउने तरखरमा रहेको देख्न सकिन्छ। निकले भने हातमा स्याम्पियन बोकेका छन्। उनले उपहारमा पाएको २०१९ मर्सिडिज मेब्याच एस-६५० को बजार मूल्य एक सय ९९ हजार डलर छ।

२००५ मा स्थापित ‘जोनस ब्रदर्स’ ब्यान्डका सदस्य निकले केही समय अगाडि मात्र आफ्ना दाजुहरुसँग आ-आफ्ना पत्नीलाई सम्बोधन गर्दै नयाँ म्युजिक भिडियो सार्वजानिक गरेका थिए। र सो गीत बिलबोर्ड चार्टमा एक नम्बरमा आउन सफल भएकै कारण उनले खुसी मनाउने क्रममा पत्नी प्रियंकालाई यस्तो सरप्राइज दिएको बताइएको छ। उनले पनि सो म्युजिक भिडियोमा खेलेकी थिइन्।