काठमाडौं । नेपाली कथानक चलचित्र ‘बुलबुल’ले डेढ करोड रुपैयाँ ग्रस कलेक्सन गरेको छ । फागुन ३ गते रिलिज भएको चलचित्रले चौथो हप्तामा आइपुग्दा डेढ करोड ग्रस कलेक्सन गरेको हो ।
८० लाखमा निर्माण भएको चलचित्र ‘बुलबुल’ अहिले कुमारी मल्टिप्लेक्समा एक शो चलिरहेको छ । एक करोडमा निर्माण भएको चलचित्रले लगानी उठाउन तीन करोड रुपैयाँ ग्रस कलेक्सन गर्नुपर्छ ।
रिलिजको दिनदेखि नै हलिउड, बलिउड र नेपालकै ठूलो व्यानरका चलचित्रको मारमा परेकाले पनि त्यसको प्रभाव कलेक्सनमा परेको निर्देशक विनोद पौडेल बताउँछन् । “फिल्मलाई समीक्षकले राम्रो भन्नुभयो । बौद्धिक वर्गले पनि रुचाउनु भयो । तर बलिउड, हलिउड र नेपालकै चलचित्र एकै दिन र त्यसपछिको हप्तामा रिलिज भएकाले त्यसको प्रभाव पनि हाम्रो चलचित्रका पर्यो,” उनले भने ।
‘बुलबुल’ रिलिज भएको दिन बलिउडको ‘गल्ली ब्वाइ’ र हलिउडको ‘अलिटा’, तथा पछिल्लो हप्ता ‘टोटल धमाल’ लागेको थियो भने त्यसपछि आएका नेपाली चलचित्र ‘क्याप्टेन’ र ‘ब्रेकअप’ले पनि व्यापारमा असर गरेको विनोद बताउँछन् ।
‘बुलबुल’ ओभरसिज मार्केटमा पनि जान लागेको उनले जानकारी दिए । विनोदका अनुसार अमेरिका, अष्ट्रेलिया, युके तथा युरोपका अन्य केही देशमा पनि चलचित्र प्रदर्शन गर्ने तयारी छ । यी देशबाट ४० देखि ५० लाख रुपैयाँ आउने उनको भनाइ छ ।
विनोद पौडेलले निर्देशन गरेको चलचित्र ‘बुलबुल’मा स्वस्तिमा खड्का र मुकुन भुषाल मुख्य भूमिकामा छन् ।
यसैबीच, चलचित्र ‘बुलबुल’ अमेरिकाको मेरिल्यान्डमा हुँदै आएको नेपाल–अमेरिका अन्तर्राष्ट्रिय फिल्म फेस्टिभलका लागि छनोट भएको छ । उक्त फेष्टिभलमा ‘बुलबुल’ ओपनिङ फिल्मको रुपमा प्रदर्शन हुने भएको छ । तेस्रो संस्करण जुन २८ देखि ३० तारिखसम्म मेरिल्यान्डमा हुँदैछ ।