काठमाडौं । सभामुख कृष्णबहादुर महराले सरकारले यति छिटो निजी विद्यालयहरुलाई अंकुश लगाउन नहुने बताएका छन् । देशमा समाजवाद उन्मुख शिक्षाको विषय उठाएपनि यो १० वर्षमा स्थापित हुने विषय नै होइन भन्दै उनले नेपालमा समाजवाद आउन धेरै वर्ष लाग्ने बताए ।
निजी तथा आवासीय विद्यालय अर्गनाइजेशन, नेपाल (प्याब्सन)को १४ औं राष्ट्रिय महाधिवेशनलाई सम्बोधन गर्दै सभामुख महराले निजी क्षेत्रलाई समर्थन र प्रोत्साहन नगरे देशको आर्थिक उन्नति नहुने तर्क गरे । सभामुख महराले सरकारले निजी विद्यालयलाई नियमन गर्नु ठीक रहेपनि नियन्त्रण गर्न नहुने बताए । उनले शिक्षामा विदेशी लगानी पनि केही मात्रामा ल्याउनैपर्नेमा जोड दिए । 
कार्यक्रमलाई सम्बोधन गर्दै शिक्षा, विज्ञान तथा प्रविधि मन्त्री गिरिराजमणि पोखरेलले निजी विद्यालयका संचालकहरुलाई मनमा कुनै संशय नराखेर शिक्षामा लगानी गर्न आग्रह गरे । उनले लगानी र सम्पत्तिको सुरक्षा सरकारले गर्ने बताउँदै निजी लगानीको नियमन र व्यवस्थापन पनि सरकारले गर्ने कुरामा जोड दिएका थिए ।  
मन्त्री पोखरेलले निजी विद्यालयहरुले गुणस्तरीय शिक्षा प्रदान गरेको बताउँदै यसले विद्यालय स्तरका बालबालिकाहरु विदेश पलायनमा निकै ठूलो भूमिका खेलेको बताए । उनले निजी विद्यालयका कारण विदेश जाने विद्यार्थीको संख्या घटेको बताउँदै अभिभावकको छनोटमा निजी विद्यालयहरु पर्नु गुणस्तरीय शिक्षाकै कारण रहेको बताएका थिए ।
कार्यक्रममा हिसानका अध्यक्ष रमेश सिलवालले सरकारले निजी विद्यालय बन्द गरे गुणस्तरीय शिक्षामा कसले लगानी गर्ने भनेर प्रश्न गरे । प्याब्सनका अध्यक्ष विजय साम्वाहाम्फेले एकता र सहमतिको राष्ट्रिय महाधिवेशन बनाउने प्रतिवद्धता व्यक्त गरे । 
जारी प्याब्सनको १४ औं महाधिवेशनले नयाँ नेतृत्व चयन गर्नेछ । अध्यक्षका लागि डिके ढुंगाना र टीकाराम पुरीले उम्मेदवारी दिएका छन् ।