एजेन्सी । मलेसियाका एक व्यक्तिलाई फेसबुकमा इस्लाम धर्म र प्रोफेट मोहम्मदको अपमान गरेको अभियोगमा १० वर्षको जेल सजायँ सुनाइएको छ । २२ वर्षीय फेसबुक प्रयोगकर्तालाई क्वालालम्पुर अदालतले शुक्रबार मात्र दशवटा आरोपमा दोषी ठहर्याएको हो ।  

यसरी रोयल मलेसिया पुलिसले उनीबाहेक अन्य तीन सामाजिक संजाल प्रयोगकर्ता विरुद्ध पनि यस्तै मुद्दा दर्ता गराएको राष्ट्रिय समाचार एजेन्सी बरनामामा प्रकाशित गरिएको छ । बरनामाको रिपोर्ट अनुसार यसमध्येका ५२ वर्षीय फेसबुक प्रयोगकर्ता याजिद कोङ दुई अभियोगमा दोषी पाइएका हुन् र अबको दुई दिनमै उनलाई जेल सजायँ दिइने बताइएको छ ।

यता ट्वीटर प्रयोगकर्ता ‘एल्भिनचो३३३’ र फेसबुक प्रयोगकर्ता ‘डेनी एन्टोनियो’ ले भने आफूमाथि लगाइएका आरोपहरु अस्वीकार गरिरहेका छन् । तरपनि उनीहरुलाई आगामी अप्रिल ५ को सुनुवाइसम्म हिरासतमै राखिने बताइएको छ । 

यसरी शुक्रबार मात्र यी चारैजनालाई दोषी ठहर गरिएको हो । धर्मका आधारमा शान्ति भङ्ग गराउने किसिमका कुनैपनि वक्तव्य प्रकाशित गर्नु र सामाजिक संजालको अनुचित प्रयोग गर्नु कानुन विपरित भएको भन्दै उनीहरुलाई यस्तो सजायँ सुनाइएको बताइएको छ ।

यसरी मलेसियामा पुलिसले देशभरबाट ९२९ रिपोर्ट प्राप्त गरिसकेको बताएको छ  जसमध्ये इस्लामको अपमान गरेका १६ घटनाहरुबारे छानबिन सुरु गरिएको इन्सपेक्टर जेनेरल मोहोम्मद फुजीले एक बयानमार्फत जानकारी दिएको सीएनएनले जनाएको छ ।