काठमाडौं । निर्मला हत्या प्रकरणमा यातना र प्रमाण नष्ट गरेको आरोपमा तत्कालीन कञ्चनपुर प्रहरीका प्रहरी उपरिक्षक (एसपी) दिल्लीराज विष्टसहित ८ जनाविरुद्ध अदालतमा मुद्दा दायर भएको छ ।  सरकारी वकिल कार्यालय कञ्चनपुरले निर्मला पन्तकी आमा दुर्गादेवी र दिलिपसिंह विष्टका दाजु खडग विष्टको जाहेरीका आधारमा जिल्ला अदालतमा छुट्टाछुट्टै मुद्दा दायर गरेको हो ।

जिल्ला प्रहरी कार्यालय कञ्चनपुरका डीएसपी कृष्णराज ओझाका अनुसार यातना दिएको अभियोगमा एसपी विष्टसहित तत्कालीन डिएसपी ज्ञानबहादुर सेठी, सीआईबीका डीएसपी अंगुर जिसी र इन्सपेक्टर एकेन्द्र खड्काविरुद्ध मुद्दा दायर गरिएको छ ।  यस्तै प्रमाण नष्ट गरेको आरोपमा तत्कालीन वडा प्रहरी कार्यालय महेन्द्रनगरका इन्सपेक्टर जगदिश भट्ट, सइहरु हरिसिंह धामी, रामसिंह धामी र प्रहरी जवान चाँदनी साउदविरुद्ध मुद्दा दायर गरिएको हो ।

सरकारले निर्मला प्रकरणमा तत्कालीन एसपी दिल्लीराज विष्ट र इन्सपेक्टर जगदिश भट्टलाई सेवाबाटै बर्खास्त गरिसकेको छ भने अन्य ६ जना प्रहरी कर्मचारी निलम्बनमा छन् । स्रोतका अनुसार मुद्दा दायर भए पनि उनीहरु सम्पर्कमा आएका छ्रैनन् ।  प्रहरी प्रवक्ता एसएसपी उत्तम सुवेदीका अनुसार डीएसपी ज्ञानबहादुर सेठीसहित ६ जना प्रहरीलाई पक्राउ गरी बुधबार जिल्ला अदालत कञ्चनपुर उपस्थित गराइएको थियो । 

उनीहरु सबै कञ्चनपुर प्रहरीको हिरासतमा रहेको प्रवक्ता सुवेदीले बताए । सुवेदीले एसपी विष्ट र अंगुर जिसी भने अदालतमा उपस्थित नभएको बताए । ‘‘अब अदालतमा दुवै पक्षको बहस हुन्छ । दुवै पक्षको बहसपछि अदालतले के आदेश दिन्छ,त्यसरी नै हामी अगाडी बढ्छौं,’’ प्रवक्ता सुवेदीले भने । यस्तोमा अदालतले अभियुक्तसँग बयान लिएर धरौटीमा छोड्ने वा पुर्पक्षका लागि कारागार समेत पठाउन सक्नेछ । 

गत साउन १० गते साथीको घरमा गएकी निर्मला साउन ११ मा घरभन्दा डेढ किलोमटिर दुरीमा रहेको उखुबारीमा मृत अवस्थमा फेला परेकी थिइन् ।  निर्मला हत्या प्रकरणको अनुसन्धाना प्रहरीले लापरवाही गरेको,प्रमाण नष्ट गरेको लगायतका आरोप सरकारले नै गठन गरेको समितिले प्रतिवेदनमा औल्याएको थियो । 

निर्मलाको बलात्कार–हत्यामा संलग्नको खोजी कार्य जारी छ । केन्द्रीय अनुसन्धान ब्यूरो (सिआइबी)को विशेष टोलीले घटनाको अनुसन्धान गरिरहेको छ ।